Կիրակի, Նոյեմբեր 13-ին, Ամերիկահայ Մշակութային Ընկերակցութեան «Արցախ Ֆոնտ»-ի ատենապետ Հայկ Օշական տեսակցութիւն մը ունեցաւ «Թիւֆէնքեան» Հիմնարկի վարիչ տնօրէն Ռաֆֆի Տուտագլեանին հետ:
Աւելի քան երկու ժամ տեւողութիւն ունեցող այս տեսակցութեան ներկայ էին նաեւ՝ Ռաֆֆի Քիլեան, Անդրանիկ Գասպարեան եւ Ալեքս Սարաֆեան:
Հանդիպման ընթացքին յատկապէս քննարկեցին Առաջամուղ գիւղի հետ առընչուող հարցերը։
Առաջամուղ գիւղը կը գտնուի Արցախի հարաւային շրջանը,1993-ին ազատագրուած Հատրութէն քառասուն քլմ. ներս: «Կը հետեւինք կատարուած շինարարական աշխատանքներուն: Նմանօրինակ գիւղեր կառուցելը անհրաժեշտ է, յատկապէս որեւէ ազերի ներթափանցում կանխելու համար: Առաջնահերութիւն մըն է այսպիսի շրջաններ վերաբնակեցնելը», յայտնեց Ամերիկահայ Մշակութային Ընկերակցութեան «Արցախ Ֆոնտ»-ի ատենապետ Հայկ Օշական:
2004-էն ի վեր այս գիւղը վերաբնակեցնելու գաղափարը մտայղացուած է «Թիւֆէնքեան» հիմնարկին կողմէ, գործակցաբար Արցախի Հանրապետութեան վերաբնակեցման բաժինի հիմնարկին հետ:
2012-ին, գործակցաբար Ամերիկահայ Ընկերակցութեան Արցախ ֆոնտին հետ, որոշուեցաւ շրջանէն ներս յաւելեալ բարելաւումներ եւ ներդրումներ կատարել:
Առաջամուղ գիւղին մէջ կառուցուած են՝ 19 տուներ, դպրոց եւ քաղաքապետարան: Բնակիչներու շարքին են նախապէս բանակին մէջ ծառայած եւ այժմ հանգստեան կոչուած բանակայիններ, Ազրպէյճանէն ժամանած գաղթական հայորդիներ եւ մօտակայ շրջաններէ ժամանած երիտասարդ զոյգեր:
Ընդամէնը 24 տուներու կառուցումով՝ բնակչութեան թիւը պիտի բարձրանայ 90-էն 120-ի:
