Դեռ հաշուած օրեր անցած են ՀՀ սփիւռքի նախարարութեան հնչեցուցած համահայկական կոչին` 2017 թուականը համայն հայութեան համար դարձնելու Արցախի տարի, բայց արդէն բազմաթիւ արձագանգներ կան սփիւռքեան համայնքներէն, հայկական դպրոցներէն ու միութիւններէն:
«Դուն ի՞նչ կ’ընես Ղարաբաղի համար» խորագիրով շարժումին յայտարարութիւնը տարածուած է Սփիւռքի շարք մը լրատուամիջոցներու մէջ, որուն իբրեւ արդիւնք քիչ չեն նաեւ այս կամ այն նախաձեռնութեամբ հանդէս գալու առաջարկ ներկայացուցած կառոյցները:
Ալմելոյի եւ Նոր Ջուղայի հայկական համայնքները արդէն իսկ իրականութիւն դարձուցած են իրենց նախաձեռնութիւնը: Մասնաւորապէս, ինչպէս կը հաղորդէ «Հայերն այսօր»-ը, Ալմելոյի Հայ առաքելական Սուրբ Գրիգոր Լուսաւորիչ եկեղեցւոյ սրահին մէջ, տեղի ունեցած է «Աջակցիլ Լեռնային Ղարաբաղին» արշաւի գործողութիւններուն մասին ձեռնարկը: Իսկ Նոր Ջուղայի մէջ կազմակերպած են աշնանային մթերքներու վաճառք՝ ի զօրակցութիւն արցախահայութեան:
Ռուսաստանի Դաշնութեան Ուֆա եւ Օպնինսկ քաղաքներուն մէջ գործող կիրակնօրեայ հայկական դպրոցներու եւ Քուէյթի ազգային վարժարանի սաներն ալ միացած են հայկական աշխարհի մէջ ձեռնարկը հանրայնացնելու կոչին` «Դուն ի՞նչ կ’ընես Ղարաբաղի համար» գրութեամբ պաստառներով լուսանկարներ տեղադրելով իրենց էջերուն վրայ:
Նշենք, որ Եւրոպայի, ԱՄՆ-ի ու Ռուսիոյ շարք մը համայնքներու մէջ, յառաջիկայ օրերուն եւս, տեղի պիտի ունենան Արցախին նուիրուած մշակութային, բարեգործական ձեռնարկներ, որոնց մասին տեղեկատուութիւնը «Հայերն այսօր»-ը պիտի ներակայացնէ իր էջերուն վրայ:
