Պաշտպանութեան նախարար Վիգէն Սարգսեան յառաջիկայ օրերուն պիտի անդամակցի Հայաստանի Հանրապետական կուսակցութեան: Այս մասին լրատուամիջոցներու ներկայացուցիչներու հետ հանդիպման ընթացքին յայտնած է անձամբ Պաշտպանութեան նախարարը:
Հանդիպման ընթացքին նորանշանակ նախարարը ներկայացուցած է բանակաշինութեան եւ պաշտպանական քաղաքականութեան ոլորտին մէջ յառաջիկային իր ընելիքներն ու պատասխանած է հարցումներուն: Ի դէպ` Վիգէն Սարգսեան նշած է, որ կը զբաղեցնէ քաղաքական պաշտօն եւ պատրաստ է իր որդեգրած քաղաքականութեան համար պատասխանատուութիւն ստանձնելու:
Panorama.amը Վիգէն Սարգսեանին հարց տուած է, թէ ինչպէս քաղաքական պատասխանատուութիւն ստանձնելու պատրաստակամութիւնը կը համադրուի այն փաստի հետ, որ նորանշանակ նախարարը կը հանդիսանայ անկուսակցական:
Ի պատասխան, Վիգէն Սարգսեան նշած է, որ թէեւ անկուսակցական է, սակայն անցեալ ութ տարիներուն աշխատելով երկրի նախագահի աշխատակազմին մէջ, առնչութիւններ ունեցած է իշխող Հանրապետական կուսակցութեան հետ:
Անոր խօսքով` իր պաշտօնը եղած է հայեցողական եւ որեւէ կուսակցութեան անդամակցելու հարց չէ եղած: Այսօր, սակայն, զբաղեցնելով քաղաքական պաշտօն, ան որոշած է զինք ընդունելու խնդրանքով յառաջիկայ օրերուն դիմել ՀՀԿին։
