Ռազմական փորձագէտ, Կովկասի հիմնարկի փոխտնօրէն Սերկէյ Մինասեանը իր “Զսպումը Արցախեան հակամարտութեան մէջ” ռուսերէնով մենագրութեան, որ լոյս տեսած է շաբաթներ առաջ, յաւելուածներու բաժինին մէջ կը ներկայացնէ վիճակագրական տուեալներ Հայաստանի, Արցախի եւ Ազրպէյճանի զինուած ուժերու մասին, կը հաղորդէ Հայկական ուսումնասիրութիւններու Անի կեդրոնը:
Փորձագէտը վիճակագրական տուեալները կը ներկայացնէ` հիմք ընդունելով բաց աղբիւրները եւ իր գնահատումները: Այսպէս, 2016 թուականի Յունուար 1ի դրութեամբ, Ազրպէյճանի զինուած ուժերուն թիւը, ըստ պաշտօնական տուեալներու, կազմած է 70 հազար: Ոչ պաշտօնական տուեալներով այդ թիւը 90 հազար է:
Հայաստանի զինուած ուժերուն թիւը, պաշտօնական տուեալներով, կազմած է 46 հազար, ոչ պաշտօնականը` 48 հազար:
Արցախի պաշտպանութեան բանակի թիւին մասին պաշտօնական տուեալներ չկան, ոչ պաշտօնապէս այս թիւը 20 հազար է:
