*ՍԵՒԱԿ ՅԱԿՈԲԵԱՆ*
Իր տեսակին մէջ եզակի նախաձեռնութիւն մը իր իմաստալից բովանդակութեամբ: DEMCO (Տէմիրճեան Հաստատութիւնը) հետաքրքրական ծանուցումով մը՝ «Lebanon Is Calling» հանդէս եկած է CNN նման կայանի մը վրայ:
Այս մասին երէկ ինծի յուշեց ընկեր Կարապետ Պապահէքեանը: Համացանցի վրայ գտայ զայն: Ըստ ինծի DEMCOի նշեալ ծանուցումը սոսկ առեւտրական ծանուցումէն անդին կ’անցնի:
Լիբանանեան իմաստով ազգային կարեւոր նշանակութիւն ունի: Հայկական իմաստով՝ երախտագիտական խորունկ իմաստ:
Ծանուցումը կը ներկայացնէ Նիւ Եորքեան գրասենեակ մը, ուր ըստ երեւոյթին հոն հաստատուած ու գործող յաջողակ լիբանանցի մը, հեռաձայն կը ստանայ: Խօսողը Լիբանանն է…: Մնացեալը շատ զգացական խօսակցութիւն մըն է, որ տեղի կ’ունենայ արտերկիր ապրող լիբանանցիի մը եւ իր հայրենիքին միջեւ: Հայրենիքը զինք կը կանչէ ըսելով, որ ինք ապաքինած է այլեւս եւ կ’ուզէ գոյատեւել իր զաւակին հետ կողք կողքի…:
Ծանուցումը շատ լաւ ընտրուած ժամանակով սփռուած է: Ամերիկայի նախագահական ընտրութիւններու նախօրէին եւ անկէ օր մը վերջ, երբ անոր հետեւողներու թիւը չափանիշային էր…:
Շնորհակալ նախաձեռնութիւն մը Տէմիրճեան հաստատութեան կողմէ լիբանանցիին այլեւս տուն վերադարձնելու: Այս նախաձեռնութիւնը նաեւ երախտապարտ հայու արարք է լիբանանեան հայրենիքին նկատմամբ:
Կը մնայ մեր ձայնը միացնել DEMCO-ի սրտագին կոչին քաջալերելու իւրաքանչիւր լիբանանցիի անսալու հայրենիքի կանչին՝ վերադառնալու երկիր:
