Նախագահ Սերժ Սարգսեան շնորհաւորական ուղերձ յղած է Միշէլ Աունին` Լիբանանի Հանրապետութեան նախագահ ընտրուելուն առթիւ: Այս մասին՝ ըստ «Արմենփրես»-ին՝ տեղեկացուցած են ՀՀ նախագահի աշխատակազմի հասարակայնութեան եւ տեղեկատուութեան միջոցներու հետ կապերու վարչութենէն:
«Վստահ եմ, որ ձեր երկարամեայ փորձառութիւնը եւ Լիբանանի բարեկեցիկ ու անվտանգ ապագայի ապահովման անմնացորդ նուիրուածութիւնը լաւագոյնս կը ծառայեն իրենց նպատակին:
«Համոզուած եմ, որ ձեր պաշտօնավարութեան ընթացքին հայ եւ լիբանանցի ժողովուրդներուն` դարերու խորքէն եկող բարեկամութիւնը աւելի կ’ամրապնդուի եւ կը ստանայ նոր որակներ:
«Կը մաղթեմ ձեզի քաջառողջութիւն եւ ձեր առջեւ դրուած բոլոր նպատակներն ու ծրագիրները իրականացնելու ուժ ու կորով»,- ըսուած է ՀՀ նախագահի շնորհաւորական ուղերձին մէջ:
