Նարէ Մկրտչեանի «Տան միւս կողմը» ( The Other Side of Home) վաւերագրական ֆիլմը ընդգրկուած է Օսկարի «Լաւագոյն վաւերագրական կարճամետրաժ ֆիլմ» անուանակարգի սեղմ ցուցակին մէջ (short list): Ինչպէս կը հաղորդէ «Արմենփրես»-ը, անիկա 9 այլ կարճամետրաժ ֆիլմերու հետ կը պայքարի Օսկարի համար:
«Տան միւս կողմը» վաւերագրական ֆիլմը կը պատմէ Թուրքիոյ քաղաքացի կնոջ մը մասին, որ 2015 թուականին կը պարզէ, թէ իր մեծ մայրը Ցեղասպանութիւնը վերապրողներէն մէկն է, եւ կ’որոշէ մեկնիլ Հայաստան` մասնակցելու Հայոց ցեղասպանութեան 100րդ տարելիցի ձեռնարկներուն: Անոր մէջ միշտ կը պայքարին Ցեղասպանութիւն վերապրածն ու Ցեղասպանութիւնը ժխտողը:
Երեւան ծնած բեմադրիչ Նարէ Մկրտչեանը Լոս Անճելըս տեղափոխուած է 15 տարի առաջ: Ուսանած է համաշխարհային ֆիլմարուեստի ներկայացուցչական դպրոցներէն մէկուն (USC School of Cinematic Arts) մէջ։ Նարէ Մկրտչեանը այս տարիներուն ընթացքին, նկարահանած է աւելի քան 60 կարճամետրաժ ֆիլմ:
Օսկարի 89րդ ամէնամեայ մրցանակաբաշխութիւնը տեղի պիտի ունենայ 2017 թուականի Փետրուար 26ին:
