Հայաստանի վարչապետ Կարէն Կարապետեան Ամերիկայի հայկական համագումարի պատուիրակութիւնը ընդունած ատեն յայտարարեց, թէ Հայաստան կ’ուզէ որ Սփիւռքը առաւել աշխոյժ մասնակցութիւն ունենայ երկրի տնտեսական կեանքին մէջ: Վարչապետը ողջունեց ու կարեւորեց համագումարի հայանպաստ գործունէութիւնը, որ ուղղուած է Հայաստան-Սփիւռք կապերու ամրապնդման եւ հայ-ամերիկեան յարաբերութիւններու խորացման: Վարչապետը նաեւ նշեց, որ կառավարութեան այսօրուան ծրագիրը կը նախատեսէ արագընթաց բարեփոխումներ՝ ներգրաւելով համայն հայութեան ամբողջ ներուժը: Ան առաջնահերթ համարեց ներդրումներու խթանումը, առեւտրային միջավայրի բարելաւումը, ինչպէս նաեւ՝ յատկապէս գիւղական համայնքներուն մէջ կրթութեան որակի բարձրացման ուղղուած ծրագիրները: Հանդիպումին քննարկուեցան նաեւ Հայաստան-Սփիւռք կապերու վերաիմաստաւորման եւ, հայապահպանութեան առնչուող հարցեր: Ամերիկայի հայկական համագումարի պատուիրակութիւնը ընդունուեցաւ նաեւ Հայաստանի արտաքին գործոց եւ Սփիւռքի նախարարներուն կողմէ:
«Հայաստան Կ’ուզէ Որ Սփիւռքը Առաւել Աշխոյժ Մասնակցութիւն Ունենայ Երկրի Տնտեսական Կեանքին Մէջ». Կարէն Կարապետեան
