Պելառուսիոյ Հանրապետութիւն կատարած աշխատանքային այցի ժամանակ, Հայաստանի Հանրապետութեան վարչապետ Կարէն Կարապետեանը Մինսկի մէջ առանձնազրոյց ունեցած է Ռուսիոյ Դաշնութեան կառավարութեան ղեկավար Տիմիթրի Մետվետեւի հետ: Այս մասին կը յայտնեն ՀՀ կառավարութեան մամուլի ծառայութենէն:
Ընդգծելով այն հանգամանքը, որ երկու երկիրներուն նախեւառաջ կը կապեն դաշնակցային-ռազմավարական յարաբերութիւնները, վարչապետներ՝ Կարէն Կարապետեան ու Տիմիթրի Մետվետեւ կարեւոր համարած են երկկողմ առեւտրա-տնտեսական յարաբերութիւնները աւելի խորացնելու ուղղութեամբ իրականացուող քայլերը` նկատի ունենալով նաեւ այն հանգամանքը, որ Եւրասիական Տնտեսական Միութեան մէջ Հայաստանի եւ Ռուսիոյ ներգրաւուածութիւնը նոր հնարաւորութիւններ եւ հեռանկարներ կ’ուրուագծէ:
