ԵԱՀԿ Մինսկի խումբի համանախագահներ Իկոր Փոփով (Ռուսիա), Փիեռ Էնտրիու (Ֆրանսա) եւ Ճէյմս Ուորլիք (ԱՄՆ), ինչպէս նաեւ ԵԱՀԿ գործող նախագահի անձնական ներկայացուցիչ Անճէյ Քասփրչիկ յայտարարութիւն տարածած են Հոկտեմբեր 23-25 տարածաշրջան կատարած իրենց այցի արդիւնքներուն վերաբերեալ: Այս մասին կը յայտնեն ԵԱՀԿ-ի գրասենեակէն:
Համանախագահները հանդիպած են Ատրպէյճանի եւ Հայաստանի նախագահներուն եւ արտաքին գործոց նախարարներուն, ՀՀ նորանշանակ պաշտպանութեան նախարարին, ինչպէս նաեւ Լեռնային Ղարաբաղի իշխանութիւններուն հետ: Այցի նպատակը ապրիլեան աննախադէպ բռնութիւններէն ետք ստեղծուած իրադրութեան քննարկումն էր եւ բանակցային գործընթացի մէջ դիրքորոշման յստակեցումը:
Հանդիպումներու ժամանակ, կողմերը հաստատած են, որ իրավիճակը յարաբերական հանգիստ է: Համանախագահները ընդգծած են, որ հրադադարի պահպանումը կ’ապահովէ ընթացող բանակցութիւններու անհրաժեշտ հիմքը եւ կարեւոր համարուած է Վիեննայի ու Ս. Փեթերզպուրկի մէջ ընդունած որոշումներու լիակատար իրականացումը:
Համանախագահները նաեւ քննարկած են ներկայ աշխատանքային առաջարկները` հասնելու առարկայական բանակցութիւններու՝ յանուն տեւական խաղաղութեան: Նախագահներէն իւրաքանչիւրը արտայայտած է իր տեսակէտը, թէ ինչպէ՞ս առաջ տանիլ կարգաւորման գործընթացը: Նախագահները նաեւ վերահաստատած են համաձայնութիւնը ԵԱՀԿ գործող նախագահի անձնական ներկայացուցչի գրասենեակի ընդլայնման ուղղութեամբ, եւ գործնական մանրամասնութիւնները դեռ կը շարունակուին քննարկուիլ:
Համանախագահները կը ծրագրեն հանդիպիլ արտաքին գործոց նախարարներուն 2016 թուականի Դեկտեմբերին Համբպուրկի մէջ ԵԱՀԿ նախարարական խորհրդաժողովի ժամանակ` քննարկելու ամենաշուտ ժամանակի մէջ նախագահներու հնարաւոր հանդիպումը: Ամենաբարձր մակարդակով նման երկխօսութիւնը անհրաժեշտ է՝ կարգաւորման հարցով յառաջընթաց արձանագրելու նպատակով: Տարածաշրջանային այցի ժամանակ, համանախագահները նաեւ հանդիպած են «Կարմիր խաչի միջազգային կոմիտէ»-ի հետ` քննարկելու այն աշխատանքը, զոր կազմակերպութիւնը կ’իրականացնէ կորսուած անձերու մասին տեղեկատուութեան փոխանակման ուղղութեամբ. մարդասիրական քայլ, որուն համանախագահները բոլոր մակարդակի հանդիպումներու ժամանակ, յայտնած են իրենց լիակատար աջակցութիւնը:
