Կիրակի, 03. 03. 2024

spot_img

«Մայրենիի Պաշտպան» Ա. Կարգի Մրցանակ՝ Հայ Կաթողիկէ Պատրիարքութեան Ս. Խաչ-Հարպոյեան Բարձրագոյն Վարժարանին

Երկուշաբթի, 17 Հոկտեմբերի 2016-ին, Երեւանի մէջ ՀՀ Սփիւռքի Նախարարութեան կեդրոնատեղիին մէջ տեղի ունեցաւ «Հայապահպանութեան Գործին Մէջ Նշանակալի Աւանդի Համար» համահայկական ամէնամեայ մրցանակաբաշխութեան 2015 թուականի արդիւնքներու ամփոփման եւ մրցանակներու բաշխման հանդիսաւոր արարողութիւնը:

Mayreni Bashdban 1

Միջոցառման ներկայ գտնուեցան` ՀՀ Սփիւռքի նախարար Հրանուշ Յակոբեանը, Ռուսաստանի Հայերու Միութեան (ՌՀՄ) եւ Համաշխարհային Հայկական Գոնկրէսի փոխ-նախագահներ Վլատիմիր Աղայեանը եւ Արամ Սարգսեանը, ՌՀՄ փոխ-նախագահ Լուսիկ Ղուկասեանը, ՌՀՄ տարածաշրջանային բաժանմունքներու նախագահներ, մանկավարժներ, մրցանակակիրներ եւ հիւրեր:

Սոյն մրցանքին գիծով, 2015 թուականին աշխարհի  23 երկիրներէ սփիւռքահայ կազմակերպութիւններէ, հաստատութիւններէ եւ անհատներէ ներկայացուած էր 112 յայտադիմում: Չորս անուանակարգերու մէջ կայացած մրցանքին 13 անհատ/կազմակերպութիւններ դարձած են Ա. կարգի մրցանակակիրներ, որոնց շարքին «Մայրենիի Պաշտպան» անուանակարգին մէջ Ս. Խաչ-Հարպոյեան Վարժարանը արժանացած է Ա. կարգի մրցանակին:

Հանդիսութեան ներկայ էին Լիբանանէն, Չեխիայէն, Պուլկարիայէն, Գերմանիայէն, Դանիայէն, Շուէտէն, Ռուսաստանի Դաշնութենէն,  Ուքրանիայէն եւ Վրաստանէն ժամանած մրցանակակիրներ, ընդ որում վարժարանիս տնօրէնուհի Տիկ. Ռիթա Պոյաճեանը, որոնց նախարար Հրանուշ Յակոբեանը եւ ՌՀՄ փոխ-նախագահներ Վլատիմիր Աղայեանը եւ Արամ Սարգսեանը յանձնեցին մետալներ եւ մրցանակներու վկայականներ:

ՀՀ Սփիւռքի Նախարարութեան պարգեւատրութեամբ «Մայրենիի Պաշտպան» Ա. կարգի մրցանակը, մանաւանդ որ ան զուգադիպած է Հայոց Ցեղասպանութեան 100-ամեակի տարուան՝ 2015 թուականի մրցանքին, կու գայ վկայելու, թէ Հայ Կաթողիկէ Պատրիարքութեան Ս. Խաչ-Հարպոյեան Բարձրագոյն Վարժարանի որդեգրած հայապահպանման ուղին ոչ միայն աշակերտներուն մէջ ամրօրէն կը սերմանէ մայրենի լեզուին ու մշակոյթին քաջածանօթ ըլլալու եւ անոնց կառչած մնալու հունտերը, այլեւ զանոնք պահպանելու, տարածելու եւ ծանօթացնելու իրենց հասակակից օտար աշակերտներուն:

Տնօրէնուհի Տիկ. Ռիթա Պոյաճեան շնորհակալութիւն յայտնեց Սփիւռքի Նախարարութեան՝ հայապահպանման առնչութեամբ իր ծրագիրներուն եւ տարած գնահատելի աշխատանքին համար, եւ նշեց, որ Ս. Խաչ-Հարպոյեանը կը հաւատայ, որ մայրենի լեզուն եւ մշակոյթն են հայը հայ պահելու երաշխիքը, հետեւաբար, վարժարանը իր բոլոր կարելին ի գործ կը դնէ մարդակերտումի իր առաքելութեան կողքին կերտելու նաեւ տիպար հայը, որ տէրն ու պաշտպանն է իր մշակութային եւ պատմական դարաւոր ժառանգութեան:

30-ամեայ Ս. Խաչ-Հարպոյեան Վարժարանը, կատարեալին ձգտող հայակերտումի եւ մարդակերտումի հայաշունչ դարբնոցը, այս ոգիով ու տեսլականով իր երթը կը շարունակէ դէպի նորանոր լուսաւոր ամեակներ:

Հայ Կաթողիկէ Պատրիարքութեան
Ս. ԽաչՀարպոյեան Բարձրագոյն Վարժարանի Լրատուական Մարմին     

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին