Շաբաթ, 02. 03. 2024

spot_img

ՀԲԸՄ-ՀԵԸ-ի «Արին» Պարախումբի Շքեղ Ելոյթը Ֆիւնիլի Իտալական Կեդրոնին Մէջ

ՀԵԸ-ի «Արին» պարախումբի  ելոյթներուն  ծանօթ է լիբանանահայութիւնը:Անոր համբաւը դուրս ելած է  Լիբանանի սահմաններէն՝ հասնելով Մայր  Հայրենիք եւ այլուր: «Արին» պարախումբը   իր որակաւոր  ելոյթներով  դարձած  է համագաղութային  միջոցառումներու  պարծանքը :

Աւանդութիւն մը  գոյութիւն ունի  հարաւային Լիբանանի մէջ  տեղակայուած  ՖԻՒՆԻԼ-ի խաղաղապահ   ուժերուն մօտ:  Իւրաքանչիւր  զօրագունդ, տարբեր առիթներով  կը  ներկայացնէ իր երկրի  պատմութիւնը, ազգային աւանդութիւնները:

Ուրբաթ,  23  Սեպտեմբեր 2016-ի երեկոյեան, հարաւային  Լիբանանի Նաքուրա  գիւղաքաղաքի  Շամաա  շրջանին մէջ,  ՖԻՒՆԻԼ-ի խաղաղապահ  ուժերու  ընդհանուր  հրամանատարութեան  հովանաւորութեամբ,  Հայաստանի անկախութեան  25-ամեակին առիթով եւ ի պատիւ ՖԻՒՆԻԼ-ի խաղաղապահ ուժերուն մէջ ծառայող  հայկական  զօրագունդին,  տեղի ունեցաւ  հայկական մշակոյթին  նուիրուած  երեկոյ մը:

ՀԲԸՄ-ՀԵԸ-ի «Արին»  պարախումբը հրաւէր  ստացած էր մասնակցելու սոյն  յիշատակելի  հանդիսութեան:  Անոր ելոյթը  արժանացաւ  ՖԻՒՆԻԼ-ի խաղաղապահ  ուժերուն եւ ներկաներուն  ջերմ  ընդունելութեան:  Հանդիսութեան  ներկայ  գտնուեցան  Լիբանանի մէջ ծառայող դիւանագիտական  շրջանակի  ներկայացուցիչներ, Լիբանանի մէջ Հայաստանի դեսպան Սամուէլ Մկրտչեանը  եւ  դեսպանատան անձնակազմը,  պաշտօնական հիւրեր, որոնց մէջ ՀԵԸ-ի Կեդրոնական  Վարչութեան  անդամ Արթօ  Գունտաքճեանը, ՀԲԸՄ-ՀԵԸ-ի «Արին» պարախումբի վարչութիւնը:

Երեկոյին  բացումը  կատարեց   ՖԻՒՆԻԼ-ի խաղաղապահ ուժերու  ընդհանուր հրամանատար զօրավար Լուչիանօ Փորթոլանօն: Ան դրուատեց  համաշխարհային  մշակոյթի  մէջ հայ  ժողովուրդին  դերակատարութիւնը  եւ  շնորհաւորեց հայ ժողովուրդը՝  Հայաստանի անկախութեան  25-ամեակին առիթով, ինչպէս նաեւ արժեւորեց   խաղաղապահ ուժերուն մէջ  հայկական  զօրագունդին  նախանձախնդիր  մասնակցութիւնը:

Ապա խօսք առաւ Լիբանանի մէջ Հայաստանի  դեսպան  Սամուէլ Մկրտչեանը:  Յարգելի դեսպանը  շնորհակալութիւն  յայտնեց  հայ  ժողովուրդին հանդէպ ցուցաբերուած  յարգանքին  եւ   շնորհաւորեց   ՖԻՒՆԻԼ-ի  մէջ   հայ  խաղաղապահ   ուժերը,  Հայաստանի  անկախութեան  25-ամեակին առիթով, նշելով որ միջազգային  ընտանիքը  բարձր կը գնահատէ   աշխարհի տարբեր  վայրերու մէջ  ծառայող  հայ  խաղաղապահ ուժերուն  առաքելութիւնը: Դեսպան Մկրտչեան  խաղաղութիւն մաղթեց    աշխարհի տարբեր  վայրերու մէջ  ծառայող  խաղաղապահ  բոլոր ուժերուն:  Այս  խօսքերուն  յաջորդեցին  սրտաբուխ   ելոյթներ:

Պաշտօնական խօսքերէն  ետք  տեղի ունեցաւ  հիւրասիրութիւն, որ  սիրայօժարօրէն  տրամադրած էր  « Մայրիկ»  հռչակաւոր   ճաշարանի տնօրէնութիւնը, որմէ ետք գործադրուեցաւ  գեղարուեստական կոկիկ  յայտագիր մը:  Յայտագիրին  սկիզբը ցուցադրուեցաւ  Հայ  ժողովուրդի պատմութիւնը, մշակոյթը, աւանդութիւնները խտացնող  վաւերագրական ժապաւէն մը:

UNIFIL 4

Ապա բեմ բարձրացաւ  ՀԲԸՄ-ՀԵԸ-ի «Արին» պարախումբը, որ ներկայացուցած   «Շաւալի  խոշպիլազիկ» ազգագրական պարով   արժանացաւ  ներկաներու ջերմ  գնահատանքին:  Մեր պարախումբին  ելոյթը  ոգեւորեց  ներկաները: Յատկապէս ՖԻՒՆԻԼ-ի խաղաղապահ  հայ  զինուորներուն մօտ խանդավառութիւնը մեծ էր՝ «Արին» պարախումբի կատարողութեան: Հերթաբար   ելոյթ  ունեցան նաեւ Համազգայինի  տհոլային խումբը եւ  ՆՍՄՄ-ի պարախումբը:

Հանդիսութեան  աւարտին, մեր պարախումբին նախաձեռնութեամբ ներկաները, ներառեալ   ՖԻՒՆԻԼ-ի խաղաղապահ  ուժերու  բոլոր միաւորները   միասնաբար պարեցին  «Եարխուշտա»ն:

ՀԵԸ-Ի ՄԱՄԼՈՅ  ԵՒ  ՏԵՂԵԿԱՏՈՒՈՒԹԵԱՆ ԳՐԱՍԵՆԵԱԿ

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին