Այս տարուայ առաջին կիսամեակին Հայաստան ժամանած է 501,118 զբօսաշրջիկ, որոնց 26.3 տոկոսը եկած են ԱՊՀ երկիրներէն, 23.4 տոկոսը` ԵՄ երկիրներէն եւ 50.3 տոկոսը` այլ երկիրներէ: Ինչպէս «Արմէնփրէս»-ը կը հաղորդէ՝ տեղեկանալով ՀՀ ազգային վիճակագրական ծառայութենէն, Յունուար-Յունիսին Հայաստան այցելած զբօսաշրջիկներուն 22,3 տոկոսը ժամանած է Ռուսիայէն, 17,8 տոկոսը` Իրանէն, իսկ 10,1 տոկոսը` ԱՄՆ-էն: 2015 թուականի Յունուար-Յունիսի համեմատ Հայաստան այցելած զբօսաշրջիկներուն թիւը աճած է 2.4%-ով: Ժամանողներուն 31,6 տոկոսը այցելած են գործնական նպատակով, 47 տոկոսը` հանգիստի եւ ժամանցի, 0,4-ը` բուժման, իսկ այլ նպատակներու համար այցելած են ժամանողներուն 20,9 տոկոսը:
2016 թուականի Յունուար-Յունիսին զբօսաշրջութեան նպատակով հանրապետութենէն մեկնած է 470 693 մարդ կամ 2015 թուականի նոյն ժամանակաշրջանի նկատմամբ ցուցանիշը աճած է 1.2%-ով: Ներկայացուող ցուցանիշներէն պարզ կը դառնայ, որ 2016 թուականի Յունուար-Յունիսին Հայաստանէն ինքնուրոյն մեկնած է 466 444 մարդ եւ միայն 4 249 մարդ` զբօսաշրջային գործակալութիւններու միջոցով. վերջին ցուցանիշը նախորդ տարուայ նոյն ժամանակահատուածի համեմատ աճած է 83,9 տոկոսով: Մեկնողներուն 6,7 տոկոսը հետապնդած են գործնական, 86,6-ը` հանգիստի եւ ժամանցի եւ 6,7 տոկոսը` այլ նպատակներ:
