Պաշտօնական Պաքուն բողոքագիր պիտի յանձնէ Թեհրանին` կապուած Իրանի Իսլամական Հանրապետութեան մայրաքաղաքին մէջ կազմակերպուած համահայկական խաղերուն Լեռնային Ղարաբաղի Հանրապետութեան մասնակիցներու առկայութեան հետ:
Ինչպէս կը հաղորդէ «Արմենփրես»-ը, այս մասին կը տեղեկացնէ ատրպէյճանական haqqin.azը:
Ատրպէյճանի արտաքին գործոց նախարարութեան խօսնակ Հիքմեթ Գաճիեւը տեղեկացուցած է, որ Իրանի մէջ Ատրպէյճանի դեսպանութիւնը խնդրի առնչութեամբ Թեհրանին պիտի ներկայացնէ պաշտօնական Պաքուի տեսակէտը:
Համահայկական 48-րդ մարզական խաղերը Թեհրանի մէջ մեկնարկած են Սեպտեմբեր 13-ին: 48-րդ շրջանի համահայկական խաղերը նուիրուած են «Ալիք» օրաթերթի 85-ամեակին, որ Իրանի մէջ տպագրուող երկրորդ ամենահին օրաթերթն է: Այս տարուայ խաղերուն մարզիկներ կը մասնակցին Հայաստանէն, Արցախէն, Լիբանանէն ու Վրաստանէն եւ շուրջ 20 երկիրներու հայկական լրատուամիջոցներու ներկայացուցիչներ ու լրագրողներ:
