Վերլուծելով ապրիլեան գործողութիւնները` մենք կ’ենթադրենք տեխնիկական միջոցներով աւելի յագեցուած, հնարաւորութիւններով աւելի բարձր զինուոր եւ ստորաբաժանում ունենալը, ինչպէս նաեւ` համապատասխան ապահովման միջոցառումներու իրականացումը: Այս մասին «Ռէւոլիւցիա» հաղորդման տուած հարցազրոյցի ընթացքին նշած է ԼՂՀ ՊԲ հրամանատար Լեւոն Մնացականեանը, կը հաղորդէ «Արցախփրես»-ը:
Անոր խօսքով, ապրիլեան գործողութիւններէն ետք ահռելի աշխատանք իրականացուած է. «Հիմնական մեր ուղղուածութիւնը եղել է տեխնիկական յագեցուածութիւնը` ինչպէս առաջնային գծի, հետախուզութեան, կապի միջոցների, այնպէս էլ զօրամասերի եւ ստորաբաժանումների ղեկավարման գործում»:
Հարցումին, թէ առաջնագիծի ամբողջ երկայնքով տեղադրուած գիշերային դիտարկման սարքերը տեղական արտադրութիւն են, թէ՞ այլ երկիրներու արտադրութիւն, Մնացականեան պատասխանած է. «Չասենք թէ որտեղի արտադրութիւն են, բայց մեր բոլոր աշխատանքներն ուղղուած են, որպէսզի լինի տեղական արտադրանք, յետագայում եւ՛ կիրառման, եւ՛ շահագործման առումով, եւ՛ վերանորոգման ու, ամենակարեւորը, գաղտնիութեան պահպանման առումով, մենք շեշտը դնում ենք տեղական արտադրանքի վրայ»:
Հարցումին, թէ եթէ նոր յարձակում ըլլայ, մեր բանակը` ԼՂՀ ՊԲ-ն, որքանո՞վ պատրաստ է դիմակայելու, ԼՂՀ ՊՆ հրամանատարը պատասխանած է. «Ապրիլեան պատերազմում ՊՆ-ն կատարել է իր առջեւ դրուած խնդիրները: Աստուած մի արասցէ, եթէ նման գործողութիւններ վերսկսեն` ՊՆ-ն ի զօրու է կատարել այն խնդիրները, որոնք դրուած են իր առջեւ: Մի առիթով ասել եմ` բացի պաշտպանողական բնոյթի գործողութիւններից, ես նշեցի, որ կան այլ բնոյթի գործողութիւններ, որ կը ստիպեն հակառակորդին զերծ մնալ իր մտադրութիւններից»:
Ինչ կը վերաբերի բաւարար զնատեսակներ ունենալուն, Լեւոն Մնացականեան ընդգծած է. «Մենք ունեցել ենք եւ շարունակում ենք ձեռք բերել նոր զինատեսակներ, ապրիլեան գործողութիւններից յետոյ նորովի բացայայտեցինք եւ գնահատեցինք մեր ռազմարդիւնաբերութեան ներուժը, այդ ուղղութեամբ աշխատանքներ են տարւում: Չէի ցանկանայ ծաւալուել, բայց ասեմ, որ մենք ունենք միջոցներ եւ աշխատում ենք այդ ուղղութեամբ, որ անակնկալի կը բերենք հակառակորդին, անհրաժեշտութեան դէպքում խոցում կ’իրականացուի մեր համար անհրաժեշտ ուղղութիւններում»:
Հարցումին, թէ վերջին շրջանին շարժեր կը նկատուի՞ն սահմանագիծին վրայ, զինատեսակներու կուտակումներ, խափանարար խմբեր, Լեւոն Մնացականեան պատասխանաած է. «Եթէ համեմատելու լինենք նախքան ապրիլեան գործողութիւնները եւ դրանից յետոյ դիւերսիոն-հետախուզական խմբերի գործողութիւններ, ներթափանցման փորձեր, զինատեսակների կիրառումներ, ի հարկէ, այժմ ծաւալներով անհամեմատ քիչ է, այժմ հիմնականում կիրառւում են դիպուկահար հրացաններ, խոշոր տրամաչափի հրացաններ եւ հրաձգային զէնքեր, բայց զուգահեռ իրականացւում են այլ բնոյթի միջոցառումներ, որոնք թոյլ են տալիս տուեալ եզրակացութիւնն անել: Այս վերջին մի քանի ամսուայ ընթացքում անց են կացուել օպերատիւ մարտավարական զօրավարժութիւններ յարձակողական թեմատիկայով, անց են կացւում գումարտակային զօրավարժութիւններ յարձակողական թեմատիկայով, առաջնագծում անց են կացւում մարզումներ` հրաձգային ստորաբաժանումների, տանկային ստորաբաժանումների: Ոչ միայն դիւերսիոն-հետախուզական խմբերի ներթափանցման փորձերի արդիւնքում մենք պէտք է գնահատական տանք, դա նաեւ մնացած միջոցառումների մասով է, որոնցով աշխատում են շեղել աշխարհի հասարակութեանը, ներկայացնելով, որ չեն պատրաստւում յարձակուել, այլ յարձակւում է հայաստանեան, ղարաբաղեան հատուածը: Անկախ այդ մարզումներից` մենք պէտք է միշտ պատրաստ լինենք հակառակորդի յարձակողական գործողութուններին, ուստի մենք ոչ մի րոպէ, ոչ մի վայրկեան չենք դադարում դրան պատրաստուել, համարժէք պատասխան տալ: Այսօր այդպիսի կուտակումներ չկան: Մենք ուշադիր հետեւում ենք իրենց տեղաշարժերին»:
