Հայաստանի Ազգային ժողովի նախագահ Գալուստ Սահակեան, Գերմանիոյ խորհրդարանի անդամ Ալպերթ Վայլերի գլխաւորած` Գերմանական-Հայկական համախմբումի պատուիրակութիւնը ընդունած ատեն, կարեւոր նկատեց Գերմանիոյ խորհրդարանի անդամներուն Արցախ այցելութիւնը: Սահակեան երախտագիտութիւն յայտնեց Գերմանիոյ խորհրդարանին` Հայոց Ցեղասպանութիւնը դատապարտող օրինագիծի ընդունման համար: «Համոզուած եմ, որ նման ոճրագործութիւններ ընդունելու եւ դատապարտելու ճամբով միայն՝ կարելի պիտի ըլլայ կանխել անոնց կրկնութիւնը ապագային», -յայտնեց Սահակեան:
Իր կարգին Վայլեր յատկանշական նկատեց իր պատկանած խորհրդարանին կողմէ Ցեղասպանութիւնը դատապարտող օրինագիծի ընդունումէն ետք Հայաստան տրուած այցելութիւնը: Գերմանական պատուիրակութիւնը տեսակցեցաւ նաեւ Հայաստանի արտաքին գործոց նախարար Էտուարտ Նալպանտեանի հետ: Զրուցակիցները գոհունակութիւն յայտնեցին Հայաստանի եւ Գերմանիոյ միջեւ ձեւաւորուած բարձր մակարդակի համագործակցութեան համար ու քննարկեցին փոխյարաբերութիւններու խորացման ուղղութեամբ ձեռնարկուող քայլերը: Անդրադարձ կատարուեցաւ նաեւ Հայաստան-Եւրոպական Միութիւն յարաբերութիւններուն եւ այս առումով Նալպանտեան ներկայացուց միութեան հետ նոր իրաւական հիմքի շուրջ բանակցութիւններուն ընթացքը: Ան նաեւ լուսարձակի տակ առաւ Հայաստանի եւ ԵԱՀԿ-ի Մինսքի խմբակի համանախագահներուն ջանքերը` Լեռնային Ղարաբաղի տագնապը բացառապէս խաղաղ ճամբով լուծելու առընչութեամբ:
