Հայաստանի նախագահ Սերժ Սարգսեան Գեղարքունիքի եւ Կոտայքի մարզեր տուած աշխատանքային այցելութեան ծիրէն ներս, Ծաղկաձորի մէջ հանդիպեցաւ Հայաստանի երիտասարդական հիմնադրամի կազմակերպած՝ «Բազէ-2016» համահայկական երիտասարդական հաւաքի մասնակիցներուն հետ: Սարգսեան անոնց ուղղած իր խօսքին մէջ նշեց, թէ «ուղղակի անընդունելին այն է, երբ քաղաքական պայքարի ընթացքին փորձ կը կատարուի հարցերը լուծելու բռնութեամբ կամ վատթարագոյնը՝ զէնքով: Ասիկա անթոյլատրելի է», -ըսաւ նախագահը եւ ընդգծեց, որ «բռնութիւնը երբեք լաւ արդիւնքներ չի բերեր, այլ ընդհակառակը բռնութիւնը վտանգ է թէ՛ մարդոց եւ թէ՛ երկիրի համար»: Սարգսեանի խօսքով «քաղաքական պայքարը շատ բնական է, եւ մեր երիտասարդները մէկ անգամ չէ, որ իրենց իրաւունքներու, հասարակութեան իրաւունքներու պաշտպանութեան համար դուրս եկած են քաղաքական պայքարի ու փողոց իջած: Անբնական է սակայն, երբ մարդիկ կամ կազմակերպութիւններ ու ծառայութիւններ, կը փորձեն պղտորել մարդոց գիտակցութիւնը, ելլելով իրենց սեփական շահերէն», -ըսաւ նախագահը:
Հայաստանի Նախագահ Սերժ Սարգսեան. «Հարցերը Բռնութեամբ Կամ Վատթարագոյնը Զէնքով Լուծելը Անթոյլատրելի Է»
