Ս. Աստուածածնայ Վերափոխման տօնին առիթով, Կիրակի, 14 Օգոստոս 2016-ին, հանդիսապետութեամբ Բերիոյ Հայոց Թեմի Բարեջան Առաջնորդ Գերշ. Տէր Շահան Ս. Արք. Սարգիսեանի, Քեսապի Ս. Աստուածածին եկեղեցւոյ մէջ մատուցուեցաւ Սուրբ եւ Անմահ Պատարագ, որմէ ետք, եկեղեցւոյ շրջափակին մէջ տեղի ունեցաւ խաղողօրհնէքի աւանդական արարողութիւնը։ Այս մասին կը հաղորդէ Հալէպի «Գանձասար» շաբաթաթերթը։
Քեսապի բերքին ու ժողովուրդի ուխտերուն ընծան նուիրուեցաւ Աստուծոյ, յատուկ աղօթքներու ճամբով: Ապա Սրբազան Հայրը իր պատգամը տուաւ ներկայ ժողովուրդին, որմէ ետք հաւատացեալներ օրհնուած խաղողէն ողկոյզներ ստացան։
