Ս. Աստուածածնայ տօնը նշուած է Թուրքիոյ հայկական միակ գիւղի՝ Վագըֆի եկեղեցիին մէջ: Այս մասին կը գրէ Պոլսոյ «Մարմարա»ն: Կը հաղորդուի նաեւ, որ Սուրբ Պատարագը մատուցած է Աւետիս քհնյ. Թապաշեան՝ օրհնելով գիւղացիներուն բերած խաղողը։ Եկեղեցին լեցուն եղած է նաեւ Ֆրանսայէն, Գերմանիայէն ու Թուրքիոյ զանազան մասերէ ժամանած հաւատացեալներով։ Աւետիս քհնյ. Թապաշեան իր պատգամին մէջ անդրադարձած է Ս. Աստուածածնայ տօնի իմաստին, եւ պատմած, որ հայերը, ըստ աւանդութեան՝ խաղող չեն ուտեր, մինչեւ որ խաղողը օրհնուի Ս. Աստուածածնայ տօնակատարութեան ընթացքին։ Ան ընդգծած է նաեւ, թէ Վագըֆ գիւղին մէջ, եղբայրական մթնոլորտի մէջ միասնաբար կ’ապրին քրիստոնեաները, իսլամներն ու հրեաները։ «Աղօթեցինք, որ մեր այս եղբայրութիւնը տարածուի բոլոր ժողովուրդներուն մէջ», -ըսած է ան։ Հաւաքուած հայերը ճաշակած են աւանդական հարիսան, ապա հրաժեշտ տուին՝ յաջորդ տարի նոյն վայրը հաւաքուելու խոստումով:
