Լեռնային Ղարաբաղի հակամարտութեան վերջնական կարգաւորումը կախուած Է կողմերու քաղաքական կամքէն: Այդ մասին Օգոստոս 16-ին «ՌԻԱ Նովոսթի»ին յայտնած է ԵԱՀԿ Մինսքի խումբի ամերիկացի համանախագահ Ճէյմս Ուորլիք:
Անոր խօսքով նախապէս Վիեննայի եւ Ս. Փեթերսպուրկի մէջ, Հայաստանի ու Ազրպէյճանի նախագահներ Սերժ Սարգսեանի եւ Իլհամ Ալիեւի միջեւ կայացած հանդիպումները՝ «նոր ազդակ հաղորդեցին հակամարտութեան լայն կարգաւորման բանակցային գործընթացին»:
«Կարեւորը այն է, որ նախագահները վերահաստատեցին հակամարտութեան խաղաղ լուծման իրենց յանձնառութիւնը` սահմանագիծին վրայ յարաբերական կայունութեան պահպանումով։ Բացի այդ աշխուժօրէն քննարկուած են առաջարկներ, որոնք կրնան վերականգնել խաղաղութիւնը կողմերուն միջեւ», -ըսած Է Ուորլիք:
«Մենք կը պահպանենք լաւատեսութիւնը եւ կը հաւատանք, որ այս տարի համանախագահները, բարձրաստիճան պաշտօնատարներու աջակցութեամբ, պիտի շարունակեն աշխատանքը հակամարտութեան կարգաւորման գործին մէջ յառաջընթացի հասնելու ուղղութեամբ: Հակամարտութեան խաղաղ ու վերջնական կարգաւորումը կախուած է երկու կողմերուն քաղաքական կամքէն», ընդգծած է ԵԱՀԿ Մինսքի խումբի ամերիկացի համանախագահը:
