Երեւանի Ազատութեան հրապարակին վրայ շաբաթավերջին կրկին հաւաք տեղի ունեցաւ` ի պաշտպանութիւն «Սասնայ ծռեր» խումբին: Հաւաքը վերջին օրերու համեմատ շատ կարճ տեւեց, հոն անընդհատ ելոյթ ունեցող Գայեանէ Գասպարեանին ցուցարարները թոյլ չտուին իր խօսքը շարունակել: Հաւաքի մասնակիցները այդ քայլին դիմեցին երբ Գասպարեան վիրաւորական խօսքեր արտայայտեց՝ նախորդ օրը հաւաքի ժամանակ իր ելոյթը ընդհատած քաղաքացիին հասցէին: Ցուցարարները ընդհատեցին նաեւ այլ կնկայ մը ելոյթը, որ կը գովաբանէր Ռուսիան: Հիմնադիր խորհրդարանի անդամ Ալեք Ենիգոմշեան, որ կայնած էր ամպիոնին մօտ ելոյթ չունեցաւ: Հաւաքի աւարտին երթ չկայացաւ:
