*ՍԵՒԱԿ ՅԱԿՈԲԵԱՆ*
Նկատի առա՞ծ ես սիրելի ընթերցող, որ շատ մը լիբանանցիներ, որոնց շարքին նաեւ այսպէս կոչուած պատասխանատուներ, երբ իրենց խօսակցութեան ատեն Լիբանանին կ’ակնարկեն՝ կ’ըսեն «այս երկիրը» (հայտալ պալատ), փոխանակ ըսելու «Լիբանանը»…:
«Այս երկիր»ը հասկացողութեան մէջ ժխտականութիւն մը, նաեւ մերժում մը կայ…:
Վարկաբեկում ալ կայ…:
«Այս երկիր»ը դրուածքը գործածողներուն լեզուն կարծես չերթար «Լիբանան» բառը ըսելու…: Կարծես վանողական բան մըն է ան իրենց համար…:
«Այս երկիր»ը ըսողին համար կարծես Լիբանանը իրեն չի վերաբերիր… կարծես ան կրնայ զայն փոխել ինչպէս կը փոխէ… իր գուլպան…:
Այս մարդոց մի՛ քաջալերեր սիրելի ընթերցող… եթէ ճառախօսութեան ատեն ալ այդ արտայայտութիւնը օգտագործէ՝ մի՛ ծափահարեր անոր…:
Ստիպէ, որ ան մեր երկիրը կոչէ իր անունով՝ ԼԻԲԱՆԱՆ:
