Ախալցխաի քաղաքապետարանը հայկական Սբ. Գրիգոր Լուսաւորիչ եկեղեցւոյ կտուրի վերանորգման համար 10 000 լարի յատկացուցած է: Վրացական ընդդիմութիւնը դէմ է այս քայլին պատճառաբանելով, որ իշխանութիւնը նախընտրական քայլ կ’ընէ՝ իր ընտրողներու թիւը աւելցնելու: Այս մասին կը յայտնէ akhaltskha.net-ը։
Ախալցխայի քաղաքապետարանի խորհուրդը Օգոստոս 5-ին արտահերթ նիստ կայացուց: Քաղաքապետարանի պատգամաւորները քուէարկեցին պիւտճէի մէջ փոփոխութիւն մտցնելու հարցը: Քուէարկութենէ ետք հայ պատգամաւորներու առաջարկով որոշուեցաւ՝ հայկական Սբ. Գրիգոր Լուսաւորիչ եկեղեցւոյ կտուրի վերանորոգման համար պիւտճէէն 10 000 լարի յատկացնել: Որոշման դէմ եղան Միացեալ ազգային շարժում եւ Նինօ Պուրճանաձէի գլխաւորած Ժողովրդավարական շարժում կուսակցութիւններու պատգամաւորները:
«Ինչու երկու ամիսներ առաջ ծրագրեցին եկեղեցիի կտուրի վերանորոգումը, կարելի էր չորս ամիսներ առաջ կամ ալ անցեալ տարի վերանորոգել: Ընտրութիւններէն յետոյ վերանորոգեցէք, ետքն ալ 10 000 լարիի փոխարէն 40 000 լարի ծախսեցէք, ո՞վ դէմ է, ընդհակառակը», կ’ըսէ Միացեալ ազգային շարժման ներկայացուցիչ Մալխազ Գիքօշվիլին:
Աւելցնենք, որ Ախալցխայի հայ ազգաբնակչութիւնը պակաս հետաքրքրուած չէ՝ «վիճելի» համարուող Սբ. Նշան հայկական եկեղեցւոյ կտուրը ներկելու հարցով, որ ամբողջութեամբ ժանգոտած է ու ժամանակի ընթացքին կը քայքայուի անձրեւներու տակ: Այս հարցը եւս արծարծուած է, բայց մինչեւ հիմա ապարդիւն:
