*ՄԱՐԻԱՆՆԱ ԱՆԱՆԵԱՆ*
Օգոստոս 5-ին «Արի տուն-2016» ծրագրի 6-րդ փուլի մասնակիցները ներկայ գտնուեցան Սփիւռքի նախարարութեան «Իմ Հայաստան» համահայկական 3-րդ փառատօնի «Խմբերգային արուեստի օրերու» բացման հանդիսաւոր արարողութեան, որուն կը մասնակցէին Ռուսաստանի, Վրաստանի, Լիբանանի, Եգիպտոսի, Էսթոնիոյ, Սուրիոյ, Իրանի, Լեռնային Ղարաբաղի, Հայաստանի երգչախումբերը:
«Հայերն այսօր»-ի փոխանցմամբ` մինչ համերգային ծրագրի սկսիլը արիտունցիները նախաձեռնեցին իրենց ուրոյն համերգը Ազատութեան հրապարակին վրայ: Երեւանի Եղ. Չարենցի անուան դպրոցին մէջ հայոց լեզուի ամենօրեայ դասընթացներուն ժամանակ 6-րդ փուլի մասնակիցները սորված էին հայկական պարերը եւ ոգեւորուած ստացած գիտելիքներով` համախմբուած կը պարէին` իրենց շուրջպարով գրաւելով անցորդները եւ փոխանցելով տարիներու ընթացքին իրենց մէջ արմատացած հայրենիքի եւ հայ մշակոյթի հանդէպ սէրը:
Այնուհետեւ արիտունցիները միացան «Իմ Հայաստան» փառատօնի մասնակիցներուն եւ լեցնելով դահլիճը ջերմ ծափողջոյններով` աւելի ոգեւորեցին Սփիւռքէն ժամանած երգչախումբերուն: Համերգի աւարտին բեմ բարձրացան ձեռնարկին մասնակից բոլոր խումբերը եւ միասին կատարեցին Ալեքսանդր Յարութիւնեանի «Հայրենիքիս հետ» երգը: Հանդիսատես-մասնակից կապը դարձաւ Հայրենիք-Սփիւռք ամրութեան խորհրդանիշը, հայ ժողովուրդի միասնութեան եւ յաւերժութեան ապացոյցը:
