Ախալքալաքի երիտասարդական կեդրոնին մէջ երէկ տեղի ունեցած է երգահանդէս։ Յուլիս 19-էն մեկնարկած Հայ Օգնութեան Միութեան կողմէ իրականացուող «Ջաւախք ճամբար»ը եզրափակած է իր այս տարուան աշխատանքները Ախալքալաքի մէջ: Այս մասին կը հաղորդէ Akhaltskha.net-ը։
Արդէն 5-րդ տարին է, որ Ախալքալաքի մօտ 150 երեխայ՝ կտրուելով փողոցէն եւ անհետաքրքիր առօրեայէն՝ մասնակից կը դառնայ ճամբարական հետաքրքրական եւ բովանդակալից կեանքին:
Ձեռնարկի սկիզբը ազդարարուած է «Մեր Հայրենիք»-ի կատարումով եւ Տէրունական աղօթքով: Բոլոր մասնակիցները երգահանդէսին մեծ ոգեւորութեամբ ու սիրով կատարած են ճամբարին ընթացքին, ընկերական ու ջերմ միջավայրին մէջ սորված բոլոր երգերը:
Ճամբարի ընթացքին երեխաները բաժնուած են երեք խումբի` «Կարմիր», «Կապոյտ» եւ «Նարնջագոյն», եւ փակման արարողութեան ժամանակ որոշուած էր նաեւ այդ երեք խումբերէն լաւագոյնը: Յաղթող ճանչցուած է «Կապոյտ» խումբը:
Ձեռնարկի աւարտին երեխաներէն շատերը յուզմունքով բաժնուած են իրենց սիրելի խմբապետներէն եւ խորին շնորհակալութիւն յայտնած անոնց:
«Ջաւախք ճամբար»ը պիտի շարունակէ իր գործունէութիւնը նաեւ Ծալկայի մէջ, ուր եւ մեկնած են խմբապետները, այնուհետեւ` Նինոծմինդայի եւ Ախալցխայի:
