Արդէն դասական դարձած բեմադրութեան համաձայն, Թուրքիոյ մէջ ստեղծուած իւրաքանչիւր քաոսի ժամանակ՝ թիրախ կը դառնան ոչ իսլամներն ու անոնց տաճարները: Ինչպէս կը յայտնէ «Ակունք»-ը՝ վկայակոչելով թրքական «demokrathaber.org»-ը, յեղաշրջման փորձի դէմ իրենց բողոքը արտայայտելու համար, 16 Յուլիսի երեկոյեան փողոց դուրս եկած որոշ խումբեր յարձակած են՝ Տրապիզոնի Սուրբ Մարիա կաթողիկէ եւ Մալաթիոյ բողոքական եկեղեցիներուն վրայ: Ամբոխը քարեր նետած է եկեղեցիներուն վրայ` ջարդելով ապակիները:
Եկեղեցիներու հարեւանութեամբ բնակողներու յանդիմանութեան եւ ձեռնարկած քայլերուն շնորհիւ՝ խումբերը լքած են եկեղեցիներուն տարածքները:
Յիշեցնենք, որ 2006 Փետրուար 5-ին, Տրապիզոնի Սուրբ Մարիա կաթողիկէ եկեղեցւոյ քահանան սպաննած էին նոյն եկեղեցւոյ մէջ:
