«Զարթօնք»ի նախաձեռնած տեղեկատուական եւ վերլուծական հանդիպումներու «Շրջանը Դէպի Ո՞ւր» շարքի ծիրէն ներս, երկրորդ հանդիպումը տեղի ունեցաւ երէկ՝ Երկուշաբթի, 18 Յուլիս 2016-ի երեկոյեան ժամը 8:00-ին, Թէքէեան Կեդրոնի «ՌԱԿ-ի Լսարան»ի մէջ:
Հանդիպման նիւթն էր «Իրաք. Մրցավազք Ահաբեկչութեան եւ Պետութեան Վերականգնումի Միջեւ»: Օրուան զեկուցաբերն էր գրող եւ լրագրող, իրաքեան «Ալ Իրաքիա», «Սումարիա», «Հունա Պաղտատ» եւ «Ալ Մատա» հեռատեսիլի կայաններու լուրերու եւ քաղաքական բաժինի նախկին տնօրէն եւ խմբագիր Ամժատ Իսքանտարը:
Հանդիպումը առիթ մըն էր լսելու շրջանի մանրամասնութիւններուն լաւապէս ծանօթ եւ գետնի վրայ գործած փորձառու հիւրին տուած տեղեկութիւններն ու վերլուծումները՝ ինչ կը վերաբերի Իրաքի անցեալին, ներկային եւ ապագայի մասին:
Աւարտին հետաքրքրասէր ներկաները, որոնց շարքին նաեւ իրաքահայ ընկերներ, առիթը ունեցան իրենց հարցումները ուղղելու եւ լուսաբանութիւններ ստանալու բանախօսէն:
Մանրամասնութիւններուն պիտի անդրադառնանք:
