Լոս Անճելըսի Հայ Քոյրերու վարժարանի ընտանիքը մեծ ուրախութեամբ եւ հպարտութեամբ կը յայտարարէ, թէ 6 Յուլիս 2016-ին WASC-ը (Western Association of Schools and Colleges), երկրորդ անգամ ըլլալով վարկաւորեց վարժարանս յաջորդ վեց տարիներուն համար, անոր տալով բարձր աստիճանաւորում՝ ամբողջական, օրինական վարկաւորում՝ մանկապարտէզէն մինչեւ 8-րդ կարգ, որ կը վկայէ Հայ Քոյրերու վարժարանի տիրապետած ուսումնական բարձր չափանիշները:
Այս առիթով շնորհակալութիւն կը յայտնենք բոլոր անոնց, որոնք իրենց ներդրումը ունեցան այս ծրագիրի իրականացման մէջ, ինչպէս վարժարանիս ուսուցիչներն ու պաշտօնէութիւնը, շրջանաւարտից միութիւնը, աշակերտութիւնը եւ ծնողները, նաեւ տնօրէնութիւնն ու WASC-ը:
Արդարեւ սոյն յայտարարութեամբ, Հայ Քոյրերու վարժարանը իր ուրախութեան մասնակից կը դարձնէ Քալիֆորնիոյ հայ համայնքը, ուր վարժարանս կը գոյատեւէ եւ կը ծառայէ հայ պատանիներու 32 տարիներէ ի վեր եւ տակաւին պիտի շարունակէ իր առաքելութիւնը Աստուծոյ կամքով:
ՏՆՕՐԷՆՈՒԹԻՒՆ ՀԱՅ ՔՈՅՐԵՐՈՒ ՎԱՐԺԱՐԱՆԻ
