ՀՀ նախագահ Սերժ Սարգսեան շնորհաւորական ուղերձ յղած է Մեծն Բրիտանիոյ եւ Հիւսիսային Իրլանտայի Միացեալ Թագաւորութեան վարչապետ Թերեզա Մէյին` Միացեալ Թագաւորութեան Պահպանողական կուսակցութեան ղեկավարի եւ երկիրի Վարչապետի պաշտօնը ստանձնելու առիթով:
«Վստահ եմ, որ Ձեր բազմամեայ քաղաքական փորձառութեան շնորհիւ, Դուք Միացեալ Թագաւորութիւնը կ’ուղղորդէք զարգացման եւ բարգաւաճման ճանապարհով` դիմագրաւելով առկայ բոլոր մարտահրաւէրները եւ արձանագրելով նոր յաջողութիւններ:
«Հայաստանը կարեւոր կը նկատէ Միացեալ Թագաւորութեան հետ փոխադարձ հետաքրքրութիւն ներկայացնող բոլոր ոլորտներու մէջ համագործակցութեան զարգացումը, ինչպէս նաեւ մեր երկու ժողովուրդներու միջեւ բարեկամութեան յետագայ խորացումը: Լիայոյս եմ, որ համատեղ ջանքերու շնորհիւ կրնանք որակական նոր մակարդակի բարձրացնել մեր բարեկամական կապերը եւ նոր շունչ հաղորդել երկկողմ օրակարգին` ի բարօրութիւն մեր երկրներու: Մաղթելով յաջողութիւններ Ձեր պատասխանատու առաքելութեան մէջ` Ձերդ Գերազանցութեան կը յղեմ խորին յարգանքներուս հաւաստիքը», ըսուած է ՀՀ նախագահի շնորհաւորական ուղերձին մէջ:
