8 Յուլիսին ճափոնահայ երգչուհի, երգահան եւ դերասանուհի Ստեֆանի Թօփալեան, ճափոնի մէջ կազմակերպած էր «Ներդաշնակութեան երեկոն» խորագիրով համերգային ծրագիրը, որ մեծ յաջողութիւն ունեցած է: Երեկոյի հասոյթը` 9185 եւրօ, երգչուհին պիտի նուիրէ Կիւմրիի թիւ 4 երաժշտական դպրոցին:
«Ես շատոնց ծրագրած էի այս երեկոն եւ ուրախ եմ, որ վերջապէս երազանքս իրականութիւն դարձաւ: Շնորհակալութիւն բոլորին, որ աջակցած եւ իրենց լուման ներդրած են այս ծրագիրի իրականացման: Այս երեկոյի յուշերը ես պիտի փայփայեմ իմ ամբողջ կեանքի ընթացքին», «Հայերն Այսօր»-ի փոխանցմամբ` երեկոյի աւարտին իր տպաւորութիւններով կիսուած է Ստեֆանի Թօփալեան:
Աւելցնենք, որ 2015-ի Մայիսին` որպէս «Genealogy» խումբի անդամ, Ստեֆանի Թօփալեան աշխարհի ցամաքամասերէն եկած խումբի հայ երգիչ եւ երգչուհիներուն հետ, ներկայացուց Հայաստանը Եւրոտեսիլ 2015 երգի մրցոյթին, որ տեղի ունեցաւ Աւստրիոյ մայրաքաղաք Վիեննայի մէջ:
