Ֆրանսայի ազգային տօնին առթիւ ՀՀ նախագահ Սերժ Սարգսեան այցելած է Հայաստանի մէջ Ֆրանսայի դեսպանութիւն:
Սերժ Սարգսեան ընդգծած է, որ Հայաստան հպարտ է բարեկամ Ֆրանսայի հետ իր առանձնաշնորհեալ յարաբերութիւններով:
Դեսպան Ժան Ֆրանսուա Շարփանտիէ նշած է, որ իրենց համար մեծ պատիւ է ամէնօրեայ աշխատանքով աւելի խորացնել հայ-ֆրանսական դարաւոր բարեկամութիւնը, որ դեսպանին համոզմամբ մշտական հոգածութիւն կը պահանջէ:
ՀՀ նախագահը նաեւ շնորհաւորական ուղերձ յղած է Ֆրանսայի նախագահ Ֆրանսուա Օլանտին:
«Համոզուած եմ, որ համատեղ ջանքերով կը շարունակենք ամրապնդել Հայաստանը եւ Ֆրանսան միաւորող կապերը՝ ինչպէս երկկողմ, այնպէս ալ բազմակողմ ձեւաչափերով` ի շահ մեր ժողովուրդներուն:
«Հայաստանի մէջ բարձր կը գնահատեն Ձեր անձնական հետեւողականութիւնը՝ Հայոց Ցեղասպանութեան ժխտումը օրէնքի ուժով դատապարտելու հարցով:
«Մենք մեծապէս կարեւոր կը նկատենք Ֆրանսայի` որպէս ԵԱՀԿ Մինսքի խումբի համանախագահ երկիրի, Ռուսաստանի եւ Միացեալ Նահանգներու հետ համատեղ ներգրաւուածութիւնն ու ջանքերը՝ Լեռնային Ղարաբաղի հակամարտութեան խաղաղ կարգաւորման գործընթացին մէջ` ի նպաստ մեր տարածաշրջանի խաղաղութեան եւ կայունութեան», ըսուած է ուղերձին մէջ:
