Յունաստանի Սալոնիք քաղաքին մէջ 4-8 Յուլիսին կայացած՝ Ուղղափառ երեսփոխաններու 23-րդ միջխորհրդարանական վեհաժողովին կողմէ յայտարարութիւն մը որդեգրուած է, որ կը վերաբերի Ապրիլեան քառօրեայ պատերազմին: Ըստ News.am-ի, վեհաժողովին մասնակցած Հայաստանի Ազգային ժողովի պատգամաւորներ Մկրտիչ Մինասեանն ու Արագած Ախոյեանը, այսպիսի յայտարարութեան որդեգրումը մեծ ձեռքբերում նկատած են: Յայտարարութիւնը միաձայնութեամբ ընդունած են 27 երկիրներու երեսփոխաններ։
ՀՀԿ-ի անդամ Մ. Մինասեան ըսած է, որ Հայաստան արդէն 23 տարիներէ կը մասնակցի Ուղղափառ երեսփոխաններու վեհաժողովի աշխատանքներուն եւ անոր հիմնադիրներէն կը նկատուի։ «Վեհաժողովի որոշումները ՄԱԿ կ’ուղարկուին», -աւելցուցած է ան։
Պատգամաւորներուն համաձայն՝ իրենք վեհաժողովի մասնակիցներէն խնդրած ու պահանջած են, որ այդ դէպքերուն տրուին յստակ ու հասցէագրուած գնահատականներ: «Մենք բաւական երկար աշխատեցանք յայտարարութեան վրայ: Ես մեծ վերաբերմունք զգացի յոյներու կողմէ, որոնք լուրջ ազդեցութիւն ունին», -դիտել տուած է Մինասեան։
Յայտարարութեան մէջ յատկապէս գրուած է. «Մենք կը դատապարտենք Ազրպէյճանի կողմէ վերջերս Լեռնային Ղարաբաղի շփման գիծին մէջ իրավիճակի լարումը»: Հոն կը նշուի նաեւ, որ նախայարձակ կողմը եղած է Ազրպէյճանը, որ ծանր սպառազինութիւն օգտագործած եւ քաղաքացիներով բնակուած շրջաններուն վրայ կրակ բացած է։ Յայտարարութեան տակ ստորագրած երեսփոխանները անհեռատես քայլ նկատած են՝ ղարաբաղեան խնդիրը ռազմական ճամբով լուծելու ազրպէյճանական փորձերը։
