Նախագահ Սերժ Սարգսեան Վարշաւայի մէջ հանդիպում մը ունեցած է Ֆրանսայի նախագահ Ֆրանսուա Օլանտի հետ: Այս մասին կը տեղեկացնէ ՀՀ նախագահի աշխատակազմի հասարակայնութեան եւ տեղեկատուութեան միջոցներու հետ կապերու վարչութիւնը:
ՀՀ նախագահը շնորհակալութիւն յայտնած է Հայաստանի համար կենսական նշանակութիւն ունեցող բոլոր հարցերուն մէջ Ֆրանսուա Օլանտի հետեւողական աջակցութեան եւ կարեւոր դերակատարման համար, ընդգծելով, որ Հայաստանի մէջ իրապէս կը հպարտանան Ֆրանսայի հետ առանձնաշնորհեալ յարաբերութիւններ ունենալու իրողութեամբ:
Նախագահը գոհունակութեամբ փաստած է, որ հայ-ֆրանսական տնտեսական համագործակցութիւնը տարիներու ընթացքին նկատելիօրէն ընդլայնուած է։ ԵՄ երկիրներու շարքին Ֆրանսան կը շարունակէ մնալ Հայաստանի մէջ ներդրումներու ծաւալով առաջատար դիրք զբաղեցնող երկիրներէն մէկը:
Սերժ Սարգսեան երախտագիտութիւն յայտնած է վերջերս Ֆրանսայի Ազգային ժողովին կողմէ Հայոց ցեղասպանութեան ժխտումը քրէականացնող նախագիծի ընդունման համար, որուն մէջ մեծ է նախագահ Օլանտի անձնական ներդրումը:
Հանդիպումի ընթացքին զրուցակիցները անդրադարձած են Լեռնային Ղարաբաղի հիմնախնդրին: ՀՀ նախագահը կարեւոր համարած է Ֆրանսայի` որպէս ԵԱՀԿ Մինսկի խումբի համանախագահող երկիրներէն մէկուն, աշխոյժ դերակատարութիւնը բանակցային ճանապարհով հիմնախնդրի խաղաղ կարգաւորման գործին եւ շնորհակալութիւն յայտնած նախագահ Օլանտին նաեւ անձնական ջանքերու հետեւողական ներդրումին համար:
Սերժ Սարգսեան եւ Ֆրանսուա Օլանտ երկուստէք կարեւորած են Վիեննայի եւ Ս․ Փեթերսպուրկի մէջ կայացած հանդիպումներուն ժամանակ ընդունուած յայտարարութիւններու ամրագրուած դրոյթներուն անվերապահ կատարումը: Նախագահները մտքեր փոխանակած են ԼՂ հիմնախնդրի լուծման բանակցային գործընթացը առաջ մղելու հեռանկարին շուրջ:
