Յուլիս 11-ին, ժամը 11.30-ին, ՀՀ սփիւռքի նախարարութեան մէջ տեղի պիտի ունենայ «Հայաստան. ստեղծենք միասին» առաջին երիտասարդական հաւաքի բացման հանդիսաւոր արարողութիւնը (Հասցէ` Վ. Սարգսեան 3, Կառավարական տուն 3, 9-րդ յարկ):
Հաւաքի մասնակիցներուն կ’ողջունեն ՀՀ սփիւռքի նախարար Հրանոյշ Յակոբեան, ՀՀ կրթութեան եւ գիտութեան նախարար Լեւոն Մկրտչեան, «Լոյս» հիմնադրամի կրթական ծրագիրներու գործադիր տնօրէն Ժաքլին Կարաասլանեան, «Այբ» դպրոցի տնօրէն, «ABBYY» ընկերութեան փոխնախագահ Արամ Փախչանեան:
ՀՀ սփիւռքի նախարարութեան նախաձեռնութեամբ, Հայկական բարեգործական ընդհանուր միութեան, «Լոյս» եւ «Այբ» հիմնադրամներու հետ համագործակցութեամբ` Յուլիս 11-14 Երեւանի եւ Դիլիճանի մէջ տեղի ունենալիք «Հայաստան. ստեղծենք միասին» առաջին երիտասարդական հաւաքի նպատակն է համախմբել Հայաստանի եւ Սփիւռքի երիտասարդ գիտնականները, աշխարհի առաջնակարգ համալսարաններու մէջ սորվող հայ ուսանողները` Հայաստանի իրենց գործընկերներուն հետ քննարկելու եւ մշակելու գործակցութեան նոր մօտեցումներ, առաջարկելու համագործակցութեան ծրագիրներ` ի նպաստ Հայաստանի զարգացման:
Աշխատանքները կ’իրականացուին «Բժշկութիւն եւ առողջապահութիւն»,«Տեղեկատուական արուեստագիտութիւններ», «Հայկական շահերու պաշտպանութիւն եւ մամուլ» աշխատանքային խումբերու մէջ:
Պիտի կազմակերպուին թեմատիկ քննարկումներ, հանդիպումներ ոլորտներու ներկայացուցիչներու հետ, մշակութային ձեռնարկներ, այցելութիւններ՝ համապատասխան մասնագիտական հաստատութիւններ:
Հաւաքին պիտի մասնակցի 70 երիտասարդ՝ Գերմանիայէն, Սպանիայէն, Յունաստանէն, Լեհաստանէն, Չեխիայէն, Լաթվիայէ, Շուէտէն, Ռուսիայէն, Մոլտովայէն, Սինկափուրէն, ԱՄՆ-էն, Լիբանանէն:
