*ՍԵՒԱԿ ՅԱԿՈԲԵԱՆ*
Ֆիթրի տօնը եկաւ մինչ երկիրն ու ամբողջ շրջանը կը գտնուի ապահովական լուրջ սպառնալիքներու տակ: Տօնի նախօրէին լիբանանեան Քաա աւանի մէջ պատահած անձնասպանական գործողութիւնները, Իսթանպուլի օդակայանի ահաբեկչութիւնը, Պաղտատի եւ Սէուտական Արաբիոյ պայթումները ցոյց կու տան, թէ շրջանը տակաւին երկա՜ր փակուղիէ մը պիտի շարունակէ անցնիլ, որմէ ելքի նշոյլն իսկ չկայ:
Ինչ կը վերաբերի Լիբանանին եւ շրջանի անկայունութեան, երկրի այսպէս կոչուած պատասխանատուները, փոխանակ ինքզինքնին հեռու պահելու շրջանի խնդիրներէն ու անոր խաղացողներուն գործիքը ըլլալու իրավիճակէն, տակաւին կը յապաղին երկրին գլուխը հանդիսացող նախագահ ընտրելու…:
Հակառակ այս ուղղութեամբ վերջին օրերուն գոյութիւն ունեցող դրական շարժումներուն, ես կը հաւատամ, թէ տակաւին գոյութիւն ունի պահուած թնճուկ մը, որ յօդս կրնայ ցնդեցնել ամէն տեսակի առաջխաղացք՝ այս ուղղութեամբ անոր իրագործումը յետաձգելով նուազագոյնը մէկ կամ երկու տարի, մինչեւ յստականայ նոր Սուրիոյ ուրուագիծը…:
