5 Յուլիսին Հայոց Ցեղասպանութեան բաց քննարկում տեղի պիտի ունենայ Իսրայէլի Քնեսէթին մէջ: Այդ մասին յայտնած է յայտնի պատմաբան, ցեղասպանագէտ Եաիր Աուրոնը «Զօրեան հիմնարկ»-ին տուած հարցազրոյցի ընթացքին, կը հաղորդէ panarmenian.net-ը: Ըստ անոր Իսրայէլը նախապէս ձեռնպահ կը մնար Հայոց Ցեղասպանութեան հանրային քննրակումներէն եւ ազատ քուէարկութենէն` չցանկալով վանել թրքական կառավարութիւնը, որուն ԱՄՆ-ի առանցքային դաշնակիցը կը համարէր:
5 Յուլիսի քննարկումը տեղի պիտի ունենայ Պունտեսթակի մէջ Հայոց Ցեղասպանութեան բանաձեւի ընդունումէն մօտ մէկ ամիս անց:
«Քննելով վերջերս Պունտեսթակի ընդունած բանաձեւը` կարելի է քանի մը կարեւոր երեւոյթներ առանձնացնել: Ժամանակակից Թուրքիան մեղաւոր չէ Հայոց Ցեղասպանութեան համար, սակայն Օսմանեան կայսրութեան բոլոր իրաւունքներուն եւ պարտաւորութիւններուն օրինական իրաւայաջորդն է:
Ցեղասպանութիւնը ճանչնալու փոխարէն Թուրքիոյ իւրաքանչիւր յաջորդ ղեկավար ամէն ինչ կ’ընէ՝ փաստերը խճճելու եւ ժխտելու համար: Բացի այդ Թուրքիան օգտագործելով իր զգալի աշխարհաքաղաքական, ռազմական ու տնտեսական լծակները` կ’ազդէ այլ երկիրներու վրայ, կը ստիպէ պարտադրել անոնց միանալու ժխտողական քաղաքականութեան», ըսած է Աուրոն:
«Ժամանակն է, որ Իսրայէլը պաշտօնապէս ճանչնայ Հայոց Ցեղասպանութիւնը: Ամէն տարի այս ժամանակ Քնեսէթը քննարկումներ կ’իրականացնէ այդ հարցի շուրջ: Կան կարող ձայներ, սակայն կառավարութիւնը թոյլ չի տար սկսիլ քուէարկութեան: Թող այս տարի տարբեր ըլլայ: Թող Քնեսէթի մէջ ազատ քուէարկութիւն կայանայ Հայոց Ցեղասպանութիւնը ճանչնալու կամ ժխտելու վերաբերեալ», ըսած է գիտնականը:
