*ՍԵՒԱԿ ՅԱԿՈԲԵԱՆ*
Նկարին մէջ երեւցող Պէյրութի Մազրաա շրջանի դեղարանէն երէկ գնում ըրած պահուս, 60 ամեայ տիկին մը ներս մտաւ: Կառք մը կը քշէր, որուն վրայ նստած էր իր հաշմանդամ զաւակը: Հագուստները մաշած էին ու տեսքով չափազանց չքաւոր կը թուար…:
Դեղագիր մը ունէր ձեռքը եւ անոր վրայ նշուած դեղերը կ’ուզէր գնել իր զաւկին համար, որ ըստ երեւոյթին խօսելու ալ կարողութիւն չունէր եւ միայն մօրը կը դիտէր…:
Դեղերուն գինը 118,000 լ.ո. ելաւ: Խեղճ կինը փտած պայուսակը բացաւ ու հոնկէ մանր դրամներ հանելով հաշուեց 50,000 լ.ո. , որ ամբողջ ունեցածն էր: Գանձարկղին վրայ նստող պաշտօնեայ օրիորդին ազնուութեամբ ըսաւ, որ ունեցած գումարը բաւարար չէ եւ շատ շնորհակալ կ’ըլլայ եթէ զեղջ ստանայ, որպէսզի կարենայ դեղերը ունենալ, որոնց շատ պէտք ունի իր զաւակը: Պատասխանատու օրիորդը յայտնեց, որ չի կրնար օգտակար ըլլալ: Խեղճ կինը տեղւոյն պաշտօնեաներէն խնդրեց դեղագործը կամ տնօրէնը տեսնել: Ոչ մէկը կարեւորութիւն տուաւ, մինչ ներսը գտնուող յաճախորդները իրենք իրենց անձով զբաղած էին այնքան մը, որ նոյնիսկ ոչ մէկը այդ խեղճ կինը նշմարեց: Ոչ մէկը մօտեցաւ անոր։ Անոնցմէ ոմանք զբաղած էին՝ շրթունքի ներկ, իսկ ուրիշներ անուշահոտ գնելով: Ծամոն եւ ռեժիմի շոքոլա ընտրողներ՝ իրենց գնելիքներու ծրարներուն վրայ նշուած քալորիները կը հաշուէին: Աստուածավախներ ալ կային, որոնք Ռամատանի ծոմի ընթացքին դեղ առնելը հալալ է, թէ՞ հարամ ըսելով իրարու հարցեր կու տային:
Պաշտօնեաներէն մին առաջարկեց խեղճ կնոջ դեղերը ընտրովի գնել՝ այսինքն այնքան մը դեղեր, որոնք կը համապատասխանեն ունեցած 50,000 լ.ո. -ին, մնացեալը ձգելով այլ օրուայ մը՝ երբ դրամ կ’ունենայ: Խեղճ կինը սկսաւ ընտրել այն դեղերը, որոնց ըստ երեւոյթին իր զաւակը, որ անզօր իրեն կը նայէր, անմիջապէս պէտք ունէր՝ մնացեալը թողելով այլ առիթի մը։
Համբերութիւնս հատած էր արդէն: Անմիջապէս միջամտեցի մարդկային պարտականութիւնս ընելով։ Կինը օրհնութիւններ տալով մեկնեցաւ զաւակին կառքը քշելով:
Աստուածավախներն ու շրթունքի ներկ ընտրողները անհոգ շարունակեցին իրենց գնումները…:
