Հռոմի Ֆրանչիսկոս պապը Հայաստանի մէջ նուէր ստացած է աշխարհի մէջ իր ամենափոքր դիմանկարը, որուն հեղինակը մանրաքանդակագործութեան հիմնադիր Էտուարտ Տէր-Ղազարեանի թոռն է` Էտուարտ Տէր-Ղազարեան կրտսերը: Հեղինակը ներկայ եղած է, երբ Ամենայն Հայոց Գարեգին Բ կաթողիկոսը նուէրը յանձնած է Հռոմի պապին:
«Երեք ամիսներու աշխատանքս վերջապէս հասաւ հասցէատիրոջը. Ֆրանչիսկոս պապի` աշխարհի մէջ ամենափոքր` 1 միլիմեթրանոց դիմանկարը սաթի բեկորի վրայ,այսօր Ն.Ս.Օ.Տ.Տ. Գարեգին Բ Ամենայն Հայոց կաթողիկոսը Մայր Աթոռ Սուրբ Էջմիածնի մէջ նուիրեց Սրբազան Քահանայապետին:
Կաթողիկոսը Ֆրանչիսկոս պապին ներկայացուց զիս եւ մանրաքանդակագործութեան արուեստը: Սեփական դիմանկարը տեսնելով խոշորացոյցի տակ` Հռոմի պապը իրեն յատուկ անմիջականութեամբ բարձր ծիծաղեցաւ եւ շնորհակալութիւն յայտնեց:
Սուրբ Աթոռի մամլոյ գրասենեակի տնօրէն մոնսինեօր Ֆետերիքօ Լոմպարտին լրագրողներուն արդէն հասցուցած է պատմել այս նուէրին մասին»,- կը նշէ Էտուարտ Տէր-Ղազարեան:
