Հայաստանի Հանրապետութեան կեդրոնական դրամատունը թողարկած է յուշամետալ` նուիրուած Նորին Սրբութիւն Հռոմի Պապ Ֆրանչիսկոսի Հայաստանի Հանրապետութիւն այցին (24-26 Յունիս 2016), որուն կարգախօսն է «Այց առաջին քրիստոնեայ երկիր»:
Այս մասին կը տեղեկացնէ Կեդրոնական դրամատան հասարակայնութեան հետ կապերու ծառայութիւնը:
Յուշամետալի դիմերեսին պատկերուած է Խոր Վիրապի վանքը Արարատ լերան ֆոնի վրայ եւ Ֆրանչիսկոս Պապի այցի թուագրումը, իսկ դարձերեսին` Սուրբ Գրիգոր Լուսաւորիչի արձանը Վատիկանի Սուրբ Պետրոս տաճարի արտաքին որմնախորշին վրայ (2005 թ., քանդակագործ Խաչիկ Ղազանչեան), Հայաստանեայց Առաքելական Սուրբ Եկեղեցւոյ եւ Հռոմի Կաթողիկէ Եկեղեցւոյ զինանշանները:
Յուշամետալը սահմանափակ քանակութեամբ է եւ ունի պատմամշակութային արժէք:
