Հռոմի Սրբազան Քահանայապետ Ֆրանչիսկոս Պապը Հայաստան կատարելիք եռօրեայ այցի մեկնարկին, հեռագիր յղած է Իտալիոյ նախագահ Սերխիօ Մատարելլային:
Ինչպէս կը հաղորդէ «Արմէնփրես»-ը` վկայակոչելով Վատիկանի ռատիոն, հեռագիրին մէջ կ’ըսուի. «Այս պահուն, երբ կը սկսիմ ուխտագնացութիւնս Հայաստան` թաթախուելու այդ ժողովուրդի հնագոյն իմաստութեան մէջ, հաստատելու անոնց հաւատքը, աջակցելու խաղաղութեան ու հաշտեցման ուղղուած ճանապարհին կատարուող բոլոր ջանքերուն, կը դիմեմ ձեզի, պարոն նախագահ, եւ ողջ իտալացի ժողովուրդին իմ սրտանց ողջոյններով ամբողջ երկրին` քաջալերելով մնալ համերաշխութեան առաջին գիծին վրայ եւ ապագային նայիլ՝ վստահութեամբ ու յոյսով»:
