Յունիս 24-ին ժամը 19:00-ին, Գիւմրիի Սրբոց Նահատակաց հայ կաթողիկէ առաջնորդանիստ եկեղեցւոյ մէջ, տեղի պիտի ունենայ նոյն եկեղեցւոյ «Ալաշկերտ» հոգեւոր երգչախումբի մեներգչուհի Մերի Մկրտչեանի համերգը` նախաձեռնութեամբ Գիւմրիի հայ կաթողիկէներու ժողովրդապետ Տ. Գրիգոր աւագ քահանայ Մկրտչեանի: Համերգի խորագիրն է «Հոգեւոր համերգ ընդառաջ Սրբազան Քահանայապետի այցին»:
Սրբազան քահանայապետի մատուցած սուրբ եւ անմահ պատարագին մասնակցելու համար, Գիւմրիի մէջ կաթողիկէ առաջնորդանիստ եկեղեցի հերթագրուած են աւելի քան 25 000 մարդիկ: Մասնակցիլ ցանկացողներուն հոսքը չի դադրիր, յայտագրումը սակայն աւարտած է Յունիս 10-ին: Սուրբ պատարագը բոլորին հասանելի դարձնելու համար՝ Յունիս 25-ին Գիւմրիի տարբեր հատուածներու մէջ պիտի տեղադրուին մեծ պաստառներ:
