Մեծի տանն Կիլիկիոյ կաթողիկոսութեան նախաձեռնութեամբ եւ ֆինանսաւորմամբ` աւարտին կը մօտենայ Նոր Կիլիկիա բնակավայրի կառուցման երկրորդ փուլի աշխատանքները:
ԼՂՀ քաղաքաշինութեան նախարարութենէն «Արցախփրես»-ին յայտնեցին, որ ծրագիրի առաջին փուլին մէջ շահագործման յանձնուած են 10 բնակարաններ, ընթացքի մէջ է եւս 20–ը: Այժմ աշխատանքներ կը տարուին այդ բնակարաններու ներքին յարդարման, փողոցներու բարեկարգման, ելեկտրականութեան մատակարարման ուղղութեամբ:
Տեղադրուած են ջրամատակարարման նոր համակարգեր. շուտով կը սկսի բնակարաններու ջուրի մատակարարումը: Կը նախատեսուի զայն շահագործման յանձնել ընթացիկ տարուան ընթացքին: Նշենք, որ Նոր կիլիկիա բնակավայրը կը գտնուի Մարտակերտի շրջանի Կիչան եւ Նոր Ղազանչի գիւղերու հարեւանութեամբ: Բնակարանները հասցէատէրերուն կը բաշխէ ԼՂՀ կառավարութեան բնակարանային յանձնաժողովը:
