*ՍԵՒԱԿ ՅԱԿՈԲԵԱՆ*
Շնորհիւ մարդ արարածին, մօտ ապագային արեւմտաափրիկեան սեւ ռնգեղջիւրը աշխարհի վրայ գոյութենէ դադրած է արդէն:
Այս կենդանիի տեսակէն մէկ հատ վերջին անգամ 7 տարիներ առաջ նշմարուած է Քամերոնի մէջ, սակայն այդ ժամանակէն ի վեր ոչ մէկ նշոյլ անկէ: Հետեւաբար Բնութեան Կարմիր Ցանկի Պաշտպանման Միջազգային Միութիւնը, պաշտօնական յայտարարութեամբ մը հանդէս եկած է այս կենդանատեսակի բացարձակ կորուստի մասին:
Փառք մարդ արարածին, որ իր որսորդութեան հաճոյքին յագուրդ տալու մղումով, նաեւ շահամոլութեան համար (ինչ կը վերաբերի ռնգեղջիւրի հազուագիւտ եղջիւրի առեւտուրի շահութաբերութեան), յաջողած է իրագործել այս «վեհ» նպատակը:
Միեւնոյն կազմակերպութիւնը բնաջնջման կարմիր գիծի վրայ յայտարարած է այլ՝ անասուններու, միջատներու ու բոյսերու տեսակներ:
Սակայն երբեք զարմանալի չէ՝ երբ գիտենք, որ խօսքը կը վերաբերի «մարդ» կոչուող էակին, որ իր հաճոյքին, ցեղապաշտութեան կամ քաղաքական ու տնտեսական շահերուն համար պատրաստ է իր եղբայրակիցն անգամ բնաջնջելու։
