Կիրակի, 03. 03. 2024

spot_img

Աշխարհի Տարօրինակութիւններէն

*ԳԷՈՐԳ ՔԷՕՇԿԷՐԵԱՆ*

  Անյաջող Յարաբերութեանց Թանգարան՝  Հոլիվուտի Մէջ

4 Յունիս 2016-ին Հոլիվուտի մէջ «Անյաջող Յարաբերութեանց Թանգարան»-ին (Museum of Broken Relationships) պաշտօնական բացումը կատարուեցաւ, որուն տէրն ու հիմնադիրն է Ճան Քուին անունով իրաւաբան մը։

Ան տարի մը առաջ Խրուաթիոյ մայրաքաղաք Զաղրեպի մէջ տեսած էր նմանօրինակ թանգարան մը եւ այդ գաղափարը հետաքրքրական գտնելով, որոշած էր կապկել զայն Հալիվուտի մէջ։ Եւ ինչու չէ, մանաւանդ որ Հոլիվուտը ամուսնալուծութիւններով յղփացած շրջան մըն է, ուր դերասաններ քանի մը անգամ կ’ամուսնանան եւ կ’ամուսնալուծուին…։

Արդարեւ, Զաղրեպի թանգարանը հիմնուած էր 2010-ին։ Ուրեմն այս պարագային Հոլիվուտը առաջնահերթ չէ եղած, հակառակ որ ան նորութիւններու եւ տարօրինակութիւններու չափանիշը միշտ կտրած է։

Վերադառնալով Հոլիվուտի թանգարանին, հոն ցուցադրութեան դրուած 100 առարկաները մնայուն չեն, այլ քանի մը ամիս անգամ մը կը փոխարինուին ուրիշ առարկաներով, որովհետեւ առարկաներու քանակը պէտք եղածէն շատ աւելի է եւ տակաւին օրըստօրէ կ’աճի։ Իսկ մուտքի վճարն է՝ 18 տոլար։ Անոնք որոնք կ’ուզեն այցելել այս թանգարանը, հասցէն է՝ 6751 Hollywood Blvd., Los Angeles:

Սակայն, ի՛նչ կը ցուցադրուի այդ թանգարանին մէջ։ Ըստ անոր վարիչ-տնօրէն Ալեքսիս Հայտի, հոն կարելի է գտնել յիշատակներ՝ ամուսնալուծուած զոյգերէ, յետս կոչուած նշանախօսութիւններէ եւ պարզ յարաբերութիւններէ, որոնք այս կամ այն պատճառաւ չեն յարատեւած։

gown

Օրինակ մը տալու համար բաւ է յիշել ամուսնալուծուած կնկայ մը հարսանեկան զգեստը, որ թխմուած է թթուաշի փոքր շիշի մը մէջ (տես նկարը)։  Իսկ մարդ մը թանգարանին նուիրած է Հալըուինի (Halloween) առիթով իր նշանածին համար պատրաստած թիթեռնիկի թեւերով տարազ մը, մինչ ան ուրիշի մը հետ յարաբերութեան մէջ գտնուած է։

 

Մեծն Բրիտանիոյ Իշխան Հերիի Անզուսպ Գրաւչութիւնը  Մանուկներու Նկատմամբ

Գաղտնիք մը չէ, որ պետական մարդիկ, սինեմայի աստղեր եւ մեծահարուստներ խոշորացոյցի տակ կ’առնուին եւ անոնց մէն մի քայլն ու խօսքը կը դառնան զգայացունց լուր եւ կը սփռուին աշխարհով մէկ՝  լրատուական բոլոր միջոցներով։

Այս դասակարգին կը պատկանին մանաւանդ Մեծն Բրիտանիոյ արքունիքի անդամները, ի մասնաւորի՝ իշխանուհի Քէյթն ու իշխան Հերին։ Իշխանուհի Քէյթը գեղեցիկ է եւ յաճախ կը բաղդատուի կէսուր մօր, ժողովուրդին կողմէ շատ սիրուած՝ հանգուցեալ իշխանուհի Տայանային հետ։ Իսկ իշխան Հերին ամուրի է եւ քիչ մըն ալ ազատամիտ՝ իր մտածելակերպին մէջ ու սանձարձակ՝ իր գործելակերպով, թէեւ՝ հոգածու կարօտեալ մանկանց նկատմամբ։

Իշխան Հերիի գեղեցկուհիներով շրջապատուած մերկ լողալը, Լաս Վեկասի պերճաշուք պանդոկներէն մէկու մը բացօդեայ աւազանին մէջ, վստահ եմ տակաւին թարմ է բոլորին յիշողութեան մէջ։

Իշխան Հերիի մասին վերջերս թուագրական վիճակագրութիւն մը հրատարակուեցաւ, որ գրաւեց ուշադրութիւնս։ Հիմա թոյլ տուէք ներկայացնեմ զայն եւ դուք դատեցէ՛ք, թէ որքանով ճիշդ կրնայ ըլլալ այդ թուաբանութիւնը։

Ուրեմն իշխանը իբրեւ թէ 23 անգամ գտնուած է անզուսպ գրաւչութեան դրութեան մէջ, մանուկներու նկատմամբ (տես նկարը)։ Յիշեալ հրատարակութիւնը նկատել կու տայ, թէ այս ընթացքը իշխանավայել չէ, այսինքն ան պէտք է աւելի լուրջ կեցուածք մը ունենայ եւ չհասարակնայ։ Իսկ պարզ ժողովուրդը գնահատելով իրենց սրտին մօտիկ այս յատկութիւնը, զայն կը վերագրեն մօրմէն ժառանգած արժանիքներուն։

Ինծի համար սակայն հարցը բոլորովին տարբեր մեկնաբանութեան դուռ կը բանայ։ Բարեկա՛մ, լրատուական միջոցներու աշխատակիցները ուրիշ կարեւոր գործ չունի՞ն զիրենք զբաղեցնող, որ կրցած են հաշիւ պահել, թէ իշխանը քանի անգամ «անվայել» դրութեան մէջ գտնուած է…։

Մինչ աշխարհը տակնուվրայ է ծայրայեղ իսլամներու ոճրագործութիւներով ու Մեծն Բրիտանիան մահուկենաց պայքար կը մղէ Եւրոպական Միութեան մէջ մնալու առընչութեամբ, լրատուական միջոցներու հետաքրքրութիւնը կը սեւեռուի մեզի համար ձանձրացուցիչ՝ արքայական պալատի անդամներուն առօրեայ զբաղումներուն։ Այս օրերուն պիտի հասնէինք։

Photos-Prince-Harry-Kids

 

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին