Ամերիկահայ մեծահարուստ Քերոլին Ռաֆայէլեան ընդգրկուած է Forbes պարբերականի, աշխարհի ամենահարուստ ինքնուրոյն կայացած կանանց ցուցակին մէջ` զբաղեցնելով 22-րդ տեղը: Ինչպէս կը հաղորդէ «Արմէնփրես»-ը, Քերոլինի կարողութիւնը կը գնահատուի 700 միլիոն տոլար:
Ան ոսկերչութեան մէջ առաջինն է ԱՄՆ-ի մէջ ինքնուրոյն կայացած ամենահարուստ կանանց շրջանակին մէջ: 2004ին ան հիմնած է «Alex and Ani» ոսկերչական զարդերու ընկերութիւնը` անուանելով զայն իր երկու դուստրերուն անուններով: Զարդերուն արժէքը ցած պահելու նպատակով ընկերութիւնը կ՛օգտագործէ վերամշակուած նիւթեր: «Alex and Ani» ընկերութիւնը ներկայիս ունի 65 խանութներ: Մինչեւ 2015ը ընկերութեան վաճառքը հասած է 500 միլիոն տոլարի:
Forbesի աշխարհի ամենահարուստ ինքնուրոյն կայացած կանանց ցուցակը կը գլխաւորեն Տայեան Հենտրիքսը (4,9 միլիառ տոլար), Օփրայ Ուինֆրին (3,2 միլիառ տոլար) եւ Ճուտի Ֆոլքնըրը (2.4 միլիառ տոլար): Ցուցակին մէջ ներառուած են նաեւ Մատոննան (25-րդ հորիզոնական, 560 միլիոն տոլար), Սելին Տիոնը (37-րդ հորիզոնական, 380 միլիոն տոլար), Պարպարա Սթրէյսընտը (38-րդ հորիզոնական, 370 միլիոն տոլար), Ճեսիքա Ալպան (42-րդ հորիզոնական, 340 միլիոն տոլար), Պիոնսէն (56-րդ հորիզոնական, 265 միլիոն տոլար), Թէյլըր Սուիֆթը (60-րդ հորիզոնական, 250 միլիոն տոլար):
