ԵԱՀԿ Մինսքի խումբի համանախագահներ Իկոր Փոփով (Ռուսիա), Ճէյմս Ուորլիք (ԱՄՆ) եւ Փիեռ Անտրէօ (Ֆրանսա), Մայիս 31-ին Ազրպէյճանի արտաքին գործոց նախարար Էլմար Մամետեարովի եւ Յունիս 2-ին Հայաստանի արտաքին գործոց նախարար Էտուարտ Նալպանտեանի հետ հանդիպումներու արդիւնքներով յայտարարութիւն տարածած են: Ինչպէս կը հաղորդէ «Արմէնփրես»-ը, համանախագահները յայտարարութեան մէջ նշած են, որ հանդիպումներու ընթացքին քննարկուած է Վիեննայի մէջ Մայիս 16-ին տեղի ունեցած գագաթաժողովի ժամանակ ընդունած որոշումներու կեանքի կոչման հարցը:
«Նախարարները վերահաստատած են իրենց յանձնառութիւնը՝ Լեռնային Ղարաբաղի հակամարտութեան խաղաղ կարգաւորման հարցով: Համանախագահները նախարարներուն ներկայացուցած են փաստաթուղթեր՝ ԵԱՀԿ գործող նախագահի անձնական ներկայացուցիչի գրասենեակի լիազօրութիւնները ընդլայնելու եւ ԵԱՀԿ հետախուզական մեքանիզմներ ներդնելու հարցին շուրջ:
Նախարարները հաստատած են նախագահներու համաձայնութիւնը` Յունիսին իրականացնելու բանակցութիւններու յաջորդ փուլը` նպատակ ունենալով վերսկսելու բանակցութիւնները համապարփակ կարգաւորման շուրջ», կ՛ըսուի համանախագահներու յայտարարութեան մէջ:
