Կիրակի, 03. 03. 2024

spot_img

ՀԲԸՄ Պօղոս Գ. Կարմիրեան Վարժարան-Քաջ Նազարը Կ՛այցելէ Կարմիրեան Վարժարան

Հինգշաբթի, 26 Մայիս 2016ին «Քաջ Նազար»ը կ’այցելէր Հ.Բ.Ը.Մ.ի Պօղոս Գ. Կարմիրեան վարժարան:  Մեզմէ ո՞վ չէ կարդացած կամ չէ լսած Յովհաննէս Թումանեանի «Քաջ Նազար» հեքիաթը ու չէ ծիծաղած, նոյնիսկ երբեմն զայրացած եւ զարմացած, թէ ինչպէս վախկոտ ու ծոյլ Նազարը ճակատագիրի եւ հանգամանքներու բերումով կը տիրանայ թագաւորական գահին:

Զ. կարգի աշակերտներուն կողմէ ներկայացուած այս թատերգութիւնը արժանացաւ ներկաներուն բարձր գնահատանքին:  Թէեւ դերակատարները հմուտ դերասաններ չէին եւ հաւանաբար իրենց առաջին փորձն էր, սակայն անոնք հմտութեամբ ներկայացուցին իրենց դերը: Գնահատելի էր նաեւ Տիկին Մարալ Քէհեայեանի տքնաջան աշխատանքը:

Վարագոյրը կը բացուի եւ մեր առջեւ կը պարզուի դերձակի խանութ մը, ուր Նազարը (Գէորգ Մալեան) նստած կար կը կարէ:  Խանութ կը մտնէ անուշ ծախող կինը (Մէյլին Ագըլեան),  Նազարը մէկ-մէկ անուշները համտեսելէ ետք 2 դգալ անուշ կը խնդրէ կնոջմէ, որ բարկացած կը քսէ հացին ու կը հեռանայ:  Անմիջապէս ճանճեր կու գան ու կը դառնան անուշին շուրջ, Նազարը ճանճ մեռցնելիք կ’առնէ եւ մէկ հարուածով գետին կը փռէ եօթը ճանճեր. ապա կտոր մը կ’առնէ ու վրան կը գրէ.  «Քաջն Նազար, որ մէկ զարկով ջարդէ հազար» եւ կտորը կը կապէ մէջքին:

Գիւղին հրապարակը հաւաքուած գիւղացիները կը նկատեն Նազարին գօտիին վրայ գրուածը, անոնք կը զարմանան ու կը վախնան։ Կը յայտնուին թագաւորը (Հրակ Նագգաշեան) եւ իշխանուհին (Լիա Գալէնտէրեան), անոնք ալ կը կարդան գրութիւնը եւ թագաւորը կը խնդրէ Նազարէն, որ գիւղացիներուն սպառնացող երկու հսկաները սպաննէ:

Բ. տեսարանը՝ Նազարը անտառին մէջն է, յանկարծ երկու հսկաները (Կարօ Դաւիթեան եւ Սարգիս Մալեան) կ’երեւան:  Նազարը շնորհիւ իր ճարպիկութեան ու հնարամտութեան՝ կը յաջողի հսկաները իրարու դէմ հանել անոնց վրայ քար նետելով, որոնք իրարու հետ կը կռուին եւ գետին կ’իյնան ու կը մեռնին:

Թագաւորը երբ կ’իմանայ եղելութիւնը շատ կ’ուրախանայ ու ինչպէս խոստացած էր՝ իր աղջիկը կնութեան կու տայ Նազարին:

Երաժշտութիւն կը նուագուի եւ հարսանիք կ’ըլլայ, բոլորը ուրախ շուրջ պար կը բռնեն:

Թատերգութիւնը համեմուած էր երաժշտական հատուածներով, որ ներկայացումը աւելի հաճելի դարձուց հանդիսականներուն:

Աշակերտները լրջօրէն կը հետեւէին ներկայացման, կը զուարճանային եւ ծափերով կ’ողջունէին դերակատարները:

Կեցցե՛ն 6-րդ դասարանի աշակերտները: Վարձքը կատար Տիկին Մարալին:

Kach Nazar 3

Kach Nazar 2

Kach Nazar 1

 

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին