*ՍԵՒԱԿ ՅԱԿՈԲԵԱՆ*
Մեր ժողովուրդի զաւակներուն, մանաւանդ հայրենի կամ Հայրենիք վերջերս հաստատուածներուն «բարի» սովորութիւններէն է՝ Հայրենիքն ու անոր իշխանութիւնները վարկաբեկող յայտարարութիւններ կատարել «Ֆեյսպուք»ի իրենց էջերուն վրայ:
Երբեմն արդարացի կամ շատ յաճախ ալ չափազանցուած ու անտեղի այս պոռթկումները ես կը հաւատամ, որ ոչ մէկ օգուտ կրնան բերել իրավիճակին: Ընդհակառակը՝ կը վնասեն թէ՛ Հայրենիքի եւ թէ հայութեան շահերուն:
Հետեւաբար մեր սիրելի հայրենակիցներուն իմ ազնիւ խորհուրդս է այսուհետ, ամէն օր բացի մտահոգիչ ու զզուելի քաղաքական կամ ընկերատնտեսական ժխտական «նորութիւններէ»՝ գոնէ մէկ լաւ տեղեկատուութիւն ալ տարածել, որ աշխարհ իմանայ, թէ մեր Հայրենիքի մէջ լաւ բաներ ալ կը կատարուին…:
Քննադատելը ընդունելի է, եթէ ան սրտցաւօրէն կ՛ըլլայ եւ թիրախ կ՛ունենայ յոռի երեւոյթ մը կամ ժխտական գործունէութիւն տանող անձնաւորութիւն մը, սակայն երբե՛ք Հայրենիքը։ Հայրենի պետութիւնը պէտք չէ շփոթել իշխանութեան հետ, որ փոփոխական է, մինչ Հայրենիքը՝ յաւիտենական։
Յուսամ լաւ հասկցանք իրար սիրելի ընթերցող։
