Լեռնային Ղարաբաղի եւ Ազրպէյճանի զինուած ուժերու սահմանագիծի վրայ իրավիճակը հանգիստ է, կրակոցներու թիւը շատ քիչ է:
Այս մասին Մայիս 23-ին լրագրողներու հետ ճեպազրոյցի ընթացքին յայտարարած է ՀՀ պաշտպանութեան նախարար Սէյրան Օհանեան, որ Մայիս 22-ին եղած է Արցախ: Նախարարը հաւաստիացուցած է, որ Պաշտպանութեան բանակի ստորաբաժանումները կը վերահսկեն իրավիճակը եւ կը պահպանեն հրադադարը: «Մեր համագործակցութեան եւ փոխօգնութեան շրջանակներու մէջ ես Պաշտպանութեան բանակի առաջնագիծի վրայ էի, անձնակազմին տրամադրութիւնը բարձր է, ստորաբաժանումները պատրաստ են կատարել իրենց մարտական խնդիրները», վստահեցուցած է նախարարը:
Մայիս 22-ի լոյս 23-ի գիշերը Ղարաբաղա-ազրպէյճանական հակամարտ զօրքերու սահմանագիծին վրայ եւս՝ իրադրութիւնը շարունակած է մնալ հանգիստ: Հակառակորդը կրակի դադրեցման պայմանաւորուածութիւնը խախտած է տարբեր տրամաչափի հրաձգային զինատեսակներէ:
Հայ-ազրպէյճանական պետական սահմանագօտիի ամբողջ երկայնքով իրավիճակը չէ փոխուած: Ազրպէյճանական կողմը շարունակած է տարբեր տրամաչափի հրաձգային զինատեսակներէ անկանոն կրակոցներ արձակել՝ սահմանագօտիի հիւսիսարեւելեան հատուածի ուղղութեամբ:
