Նախագահ Սերժ Սարգսեան «Երեւան էքսփօ» ցուցահանդէսային համալիրին մէջ, ներկայ գտնուեցաւ «Նոր հեռանկարներ սուրիահայերու համար» ցուցահանդէսի բացման արարողութեան, որ կ՛իրականանայ «Տնտեսական հնարաւորութիւններու շաբաթ» գործարար համաժողովի ծիրէն ներս: Ցուցահանդէսին կը մասնակցին սուրիական պատերազմի հետեւանքով Հայաստան տեղափոխուած եւ գործարարութեամբ զբաղող սուրիահայերու եօթանասունէ աւելի ընկերութիւններ ու անհատ ձեռնարկատէրեր:
Հանրապետութեան նախագահը ծանօթացաւ տարբեր ոլորտներու մէջ գործարար գործունէութիւն ծաւալած սուրիահայերու աշխատանքի արդիւնքին` ցուցահանդէսին մէջ ներկայացուած արտադրական տեսականիին եւ առաջարկուող ծառայութիւններու սպառման հնարաւորութիւններուն, ընթացիկ խնդիրներուն ու զարգացման ծրագիրներուն: Հայաստանի մասնաւոր ձեռնարկութիւնները ցուցահանդէսին մէջ, սուրիահայերուն կը ներկայացնեն նաեւ իրենց մօտ առկայ աշխատատեղերը եւ ծառայութիւնները, իսկ պետական ու միջազգային հաստատութիւնները` աջակցութեան իրենց ծրագիրները: Տպագրութեան, հրատարակչութեան, ոսկերչութեան, փայտամշակման, զբօսաշրջութեան, ասեղնագործութեան, սարքաւորումներու արտադրութեան, հաստոցաշինութեան եւ այլ ոլորտներու մէջ արտադրանք թողարկող մեր հայրենակիցներուն ջանքերը՝ Սերժ Սարգսեան ոգեւորիչ համարեց եւ բարձր գնահատեց ներկայացուած ապրանքներու որակական յատկանիշերը: Նախագահը սուրիահայ ձեռներէցներու հետ քննարկեց իրենց արտադրանքի իրացման եւ արտահանման հնարաւորութիւններու վերաբերող հարցեր:
